Ǵylym jáne joǵary bilim mınıstrligi Til saıasaty komıteti Shaısultan Shaıahmetov atyndaǵy «Til-qazyna» ulttyq ǵylymı-praktıkalyq ortalyǵy «Men qazaqsha sóıleımin» aksııasy barysynda úzdik shyqqandardy onlaın marapattaý rásimin ótkizdi.
Is-sharany uıymdastyrýdaǵy negizgi maqsat – memlekettik tildiń qoldanys aıasyn keńeıtý, qazaq tiliniń etnosaralyq qarym-qatynas tili retindegi qyzmetin nyǵaıtý jáne memlekettik tildi meńgergen ózge ult ókilderin yntalandyrý bolsa, baıqaýdyń sharty – árbir úmitker qazaq aqyny Maǵjan Jumabaıulynyń kez kelgen shyǵarmasynan alynǵan mátindi jatqa oqyp, beınematerıaldy áleýmettik jelide jarııalaýǵa tıis.
Baıqaý-aksııaǵa elimizdiń barlyq óńirinen 200-ge tarta adam qatyssa, olardyń arasynda orys, túrik, ázerbaıjan, taǵy basqa etnos ókilderi bar eken. «Ásirese bul is-sharaǵa Jambyl oblysynyń turǵyndary aıryqsha belsendilik tanytty», deıdi uıymdastyrýshylar.
Joǵaryda aıtqanymyzdaı, áleýmettik jelidegi «lúpil» sany joǵary úmitkerlerdiń beınematerıaldaryn qazylar alqasy saralap, salystyra otyryp, júldegerlerdi anyqtady.
Mańǵystaý oblysy Munaıly aýdany Shoǵy Muńaluly atyndaǵy №5 jalpy bilim berý orta mektebiniń bıologııa páni muǵalimi Abdýlázız Májıtov (sýrette) bas júldege laıyq dep tanylyp, aqshalaı syılyqqa ıe bolsa, Almaty oblysy Qarasaı aýdany Jibek joly aýyldyq okrýgi Á.Baısalbaev atyndaǵy orta mektebiniń orys tili jáne ádebıeti pániniń muǵalimi Naǵıma Álıevaǵa birinshi oryn buıyrdy. Ekinshi oryndy Shymkent qalasyndaǵy №41 Makarenko atyndaǵy mektep ustazy Dıana Qyryqpaeva men Ulytaý oblysy Jańaarqa aýdanynyń zeınetkeri Ella Kım Tıan-Sen ózara bólisse, Temirtaý qalalyq Tilderdi damytý ortalyǵynyń tyńdaýshysy Dánııa Kalımýllova men Soltústik Qazaqstan oblysy polısııa departamentiniń qyzmetkeri Ilıa Masenko úshinshi oryndy qanaǵat tutty.
Sondaı-aq 10 qatysýshy yntalandyrý syılyǵyna ıe boldy. Budan basqa, mánerlep oqyp, sheberlik kórsetken kóptegen qatysýshy Til saıasaty komıteti tóraǵasynyń dıplomymen marapattaldy.