Joldaýdyń negizgi maqsaty elimizdegi jaǵymdy saıası jańǵyrýlardy endi ekonomıkalyq ózgeristermen ulastyrý dep oılaımyn. Al ekonomıkanyń damýy halyqtyń ál-aýqatyn odan ári jaqsartatyny sózsiz.
Joldaýda el ekonomıkasyn damytýǵa naqty baǵyttar aıqyndalyp, júzege asyrý joldary aıtyldy. Atap aıtsaq, óńdeý salasy, týrızm, orta kásipkerlikti damytý, ishki naryqty qorǵaý, geologııalyq barlaý sharalaryn jetildirý, qorǵanys-ónerkásip keshenin damytý, agroónerkásiptegi óńdelgen ónim úlesin ulǵaıtý, shaǵyn sharýashylyqtardy qoldaý, agroǵylymdy damytý, ınfraqurylym, energetıkalyq qaýipsizdik, sý tapshylyǵyn aldyn alý, kólik-logıstıka jáne IT, jasandy ıntellekt, kreatıvti ındýstrııa salalaryn damytý, halyqtyq IPO jumystaryn tezdetý jáne makroekonomıkalyq saıasatty jańartý.
Aımaqtardyń bıýdjet máselesindegi derbestigin arttyrý, qosymsha qun salyǵy men ózge de salyqtardan túsetin kiristiń bir bóligin óńirlerge berý, aýdan ákimderine jergilikti bıýdjetti basqarý quqyǵyn berý, jergilikti bıýdjetke jınalatyn salyqqa qatysty jeńildikterdi anyqtaý quqyǵyn aımaqtarǵa berý óńirlerdiń damýyna serpilis bereri anyq.
Al atom elektr stansasyn salý nemese salmaý máselesin jalpyulttyq referendým arqyly sheshý halyqtyń mańyzdy máselerdi sheshýdegi róliniń artqandyǵyn kórsetedi.
Bes jastan asqan balalarǵa arnalǵan «Keleshek» atty biryńǵaı erikti jınaqtaý júıesiniń engizilýi, «Ulttyq qor – balalarǵa» jobasy, zııandy eńbek jaǵdaıynda uzaq jumys istegen adamdarǵa zeınet jasyna tolǵanǵa deıin 55 jastan bastap arnaýly áleýmettik tólemniń tólenýi, eń tómengi jalaqy mólsheriniń birtindep ósýi áleýmettik máselelerdi odan ári jaqsartý kepiline aınalmaq.
Amangeldi Tólemisov,
Senat depýtaty