Senator Aqmaral Álnazarova medısına mamandaryn daıarlaıtyn joǵary oqý oryndaryn qarjylandyrý máselesin kóterip, Premer-mınıstrdiń atyna depýtattyq saýal joldady, dep habarlaıdy Egemen.kz Senattyń baspasóz qyzmetine silteme jasap.
Senator saýalynda medısına mamandyqtaryna oqýǵa bólinetin memlekettik tapsyrystyń mólsheri memlekettik medısına joǵary oqý oryndarynyń oqý prosesin uıymdastyrýǵa jumsaǵan shyǵyndaryna sáıkes kelmeıtinin aıtty. Qarjylandyrýdyń jetkiliksizdigi oqý sapasyna aıtarlyqtaı áser etip, bolashaq dárigerler úshin qıyndyqtar týdyrýy múmkin ekendigine alańdaýshylyq bildirdi.
«Qarajat kólemi sońǵy 10 jyldyqta qaıta qaralmaı, 4-shi jáne odan joǵary kýrs stýdentteri úshin memlekettik granttardyń baǵasy búginde 609 myń teńgeni qurap otyr. Al 2021 jyly qaıta qaralǵan, erekshe mártebesi bar joǵary bilim berý uıymdary úshin 1 mln 188 myń teńge, basqa joǵary bilim berý uıymdary úshin 1 mln 1 myń teńge bolyp bekitilgen baǵa, tek qana 2021 jyldan bastap oqýǵa túsken stýdentterge ǵana tıisti. Búgingi tańda, zamanaýı medısına talaptaryna saı maman daıyndaýdyń ózindik quny - bir bilim alýshyǵa shamamen 2 mln teńgege jýyq», dedi Aqmaral Álnazarova.
Qordalanǵan máseleni kótergen senator bilim berý grantynyń jetkiliksiz quny medısına ýnıversıtetteriniń oqytýshylary úshin jalaqynyń tıisti deńgeıin qamtamasyz etýge múmkindik bermeıtinin aıtty.
Medısına qyzmetkerleriniń jalaqysy oqý oryndary oqytýshylarynyń jalaqysynan joǵary. Bul bilikti oqytýshylardyń praktıkalyq medısınaǵa ketýine ákelýi múmkin. Osyǵan baılanysty depýtat bakalavrıat, ınternatýra, magıstratýra, rezıdentýra jáne doktorantýranyń medısına mamandyqtaryn oqytý úshin memlekettik tapsyrys boıynsha respýblıkalyq bıýdjetten bólinetin granttardyń mólsherin arttyrý qajettigin jetkizdi.