Jylda osy máselege tap bolamyz. Alaıda bizdiń janymyzdy túsinip, janaıqaıymyzǵa qulaq túrip jatqan eshkim joq, ókinishke qaraı. Meniń egis alqabym shetkeri ornalasqan. Kıikter meniń jerimdi taptap baryp ótedi.
Bıyl 26 myń gektar egin ektik. Qaptaǵan kıiktiń taptaýynan 1 500 gektar eginim jaramsyz bolyp qaldy. Kıik egis alqabynyń ár shetinde júredi. Taptaǵanyńyz bylaı tursyn, jerdi tuıaǵymen tyrmalap ketedi.
Jabaıy ańnan jerdi qoryp júrmiz. 40 shaqyrymǵa qorshaý qoıdym. Munymnan eshteńe shyqpady, basqa buryshtan kelip, kiredi. Kıikterdi qansha qýalasaq ta munymyzdan túk shyǵar emes. Pisip turǵan bıdaıymyzdyń dámin kórgen álgiler tabynymen birese ana bastan, birese myna bastan kirip ketedi. Ashyǵyn aıtqanda, birneshe shaqyrym egis alqaptaryn qoryp otyrýǵa shamamyz joq. Bıyl kıik sany byltyrǵydan áldeqaıda kóbeıdi. Jáne adamnan da qoryqpaıdy. Úrkitip jibergen kúnniń ózinde ári ketse, 200 metr uzaıdy da taǵy qarap turady. Úkimet qandaı da bir shara qabyldamasa, kıik bizdi ábden shyǵynǵa ushyratty.
Kıikterdiń bizge aıtylyp júrgen esebi – qur jaı san ǵana. Myńdap júredi bir tabyny. Jalǵyz adamnyń qolynan eshteńe kelmeıdi emes pe? Aýdandaǵy sharýa qojalyqtary birigip, arnaıy chat ashyp aldyq. Sonda egistikke kirgen kıikterdiń baǵyty qalaı ketkeni, fotosyn, vıdeosyn salyp otyramyz. О́zimiz kúzetemiz. Kúnimiz kúndiz-túni kıik qýýmen ótip jatyr. «Ohotzoopromǵa» habarlasqanymyzben olar da kúnde shapqylaı bermeıdi.
Bizdiń shyǵynǵa batqanymyzdy, bul shyr-pyrymyzdy bári estip otyr. Alaıda qozǵalys joq. Osydan kele astyq qymbattaıdy. Al ol kimge unaıdy?
Seıitjappar Nyǵmetov,
«Qaınar» JShS dırektory
Qaraǵandy oblysy,
Nura aýdany