Otandyq kolledj stýdentteri kásiptik bilim berý boıynsha uıymdastyrylǵan EuroSkills Gdańsk chempıonatynda úzdik nátıje kórsetti. Dálirek aıtsaq, olar eki medal jáne tórt úzdik medalon ıelendi. Bizdiń qurama buryn-sońdy mundaı jetistikke qol jetkizgen emes.
Jahandyq jarysqa álemniń túkpir-túkpirinen 32 eldiń ókilderi qatysty. 25 jasqa deıingi 600 jas maman baq synaǵan chempıonat Polshanyń Gdansk qalasynda uıymdastyryldy. Ulttyq quramaǵa 28 qatysýshy jáne 25 halyqaralyq sarapshy kirip, 25 baǵyt boıynsha synǵa tústi. Oral aqparattyq tehnologııalar kolledjiniń stýdenti Rýslan Iýsýpov «Veb-tehnologııalar» baǵyty boıynsha kúmis medal ıelendi. Al Qostanaı avtomobıl kóligi kolledjiniń ókilderi Andreı Stepanıýk pen Stanıslav Gorısın «Jelilik jáne júıelik ákimshilendirý» baǵyty boıynsha qola júldeni qorjynǵa saldy.
Halyqaralyq jarysqa stýdentterdiń barlyǵy qatysa alady. Ol úshin óńirlik, respýblıkalyq irikteý jarystarynan súrinbeı ótý qajet. Osy joly júldemen oralǵan jastarǵa joǵary oqý oryndarynda tegin bilim alý múmkindigimen qatar, basqa da baǵaly syılyqtar beriledi.
– Bul jeńis – pedagogter men óndiristik oqytý sheberleriniń kásibı qyzmetiniń jemisi. Qajyrly eńbekpen kelgen jetistik ózge jastarǵa da úlgi bolady. Úzdik nátıjemen oralǵan balalar elimizdiń barlyq aımaǵyn aralap, stýdentterge sheberlik sabaǵyn ótkizedi. Olar qatarlastaryna halyqaralyq bilim jarystarynda qalaı jetistikke jetýge bolatynyn túsindiredi, – dedi Oqý-aǵartý mınıstrligi Tehnıkalyq jáne kásiptik bilim departamentiniń dırektory Serik Jartybaev.
EuroSkills chempıonaty – Eýropadaǵy kásiptik bilim berý jáne biliktilikti arttyrý salasyndaǵy mańyzdy is-shara. Eń iri halyqaralyq kásibı sheberlik dodasy WorldSkills Europe-ge qatysýshy elderdiń birinde eki jyl saıyn ótkiziledi. Chempıonatty uıymdastyrǵan WorldSkills International qaýymdastyǵy tehnıkalyq mamandyqtardy kásibı daıarlaýdyń mártebesi men standarttaryn arttyrý maqsatynda jumys isteıdi. Búginde qaýymdastyqqa 72 el múshe bolyp otyr. Qazaqstan bul qatarǵa 2014 jyly qosyldy.
Oqý-aǵartý mınıstrligi Tehnıkalyq jáne kásiptik bilim departamenti dırektorynyń orynbasary Aqzıra Qasymova búginde WorldSkills International uıymyna múshe elderde kadrlardy kásibı daıarlaý standarttary jetildirilip jatqanyn aıtty. «Bul tizimde biz de barmyz. Qazir WorldSkills chempıonattaryna qatysýshylardy daıyndaý, olardyń biliktilikterin arttyrý maqsatynda tıisti jumystar júrgizilip jatyr. Bul jolǵy jarysqa barmas buryn da 28 qatysýshy daıyndyqtan ótti», dedi ol.
Eske sala keteıik, Memleket basshysynyń tapsyrmasyna sáıkes, 2025 jyly 9-synyptan keıin oqýshylardy 100 paıyz qajetti mamandyqtarmen daıarlaý kózdelip otyr. Qazir bul tapsyrma 80 paıyzǵa oryndaldy.