Jetisý oblysynda joǵalǵan oqýshylardy izdeý jumystary sońǵy eki apta boıy júrgizilgen. Polıseıler men eriktiler eki jasóspirimdi izdep tapty, dep jazady Egemen.kz.
15 jastaǵy Aqerke Joldasovanyń jáne 16 jastaǵy Ámir Tergeýovtiń Úshtóbe qalasynan habar-osharsyz ketkeni týraly aryz Qaratal aýdanynyń polıseılerine 6 qyrkúıekte jazylǵan eken.
Kámeletke tolmaǵandardy jappaı izdestirý jumystaryn polısııa qyzmetkerleri, olardyń týystary, mekteptiń pedagogıkalyq ujymy jáne eriktiler júrgizgen.
«19 qyrkúıekte iz-túzsiz joǵalǵandardyń ornalasqan jeri anyqtaldy. Eki mektep oqýshysy da Shymkent qalasynda ekeni belgili boldy. Polıseıler kámeletke tolmaǵandardy Úshtóbege jetkizip, ata-anasyna tapsyrdy. Eki jasóspirim de esen, denderi saý», dedi Jetisý oblysy PD Krımınaldyq polısııa basqarmasynyń bastyǵy Qaırat Jýrýnov.