Sh.Shaıahmetov atyndaǵy «Til-qazyna» ulttyq ǵylymı praktıkalyq ortalyǵynyń bas dırektory Maqpal Jumabaı áleýmettik jelidegi paraqshasyna ortalyq quramyndaǵy Abaı ınstıtýtynyń áleýetin arttyrýǵa kúsh salynyp jatqanyn jazdy. Bolashaqta ony álemdegi Gete, Iýnýs Emre ınstıtýttary deńgeıine kóterý kózdelip otyr. Qazir maqsat aıqyndalyp, tıisti jumystar da bastalǵan.
Sheteldegi qazaq dıasporasyna qazaq tilin úıretý – ınstıtýttyń negizgi mindetteriniń biri. Instıtýttyń til úıretý baǵyty osydan úsh jyl buryn bastalǵan bolatyn. Bastapqyda bes oflaın synyp ashylsa, búginde onyń sany eki ese ósken. Reseıdiń Omby, Polshanyń Varshava qalalarynda bıylǵy maýsym aıynan, Mońǵolııanyń Ulanbatyr, Iran Respýblıkasynyń Gorgan qalasynda shildeden, Túrkııanyń Antalııa qalasynda tamyzdan beri oqytý júrip jatyr. Túrkııanyń Ystambul, Fransııanyń Parıj, Aýstrııanyń Vena, Majarstannyń Býdapesht qalalary men AQSh-tyń Kalıfornııa shtatynda qyrkúıek aıynan bastap oqytý tolyqqandy júre bastady. Sabaqtar «Til-qazyna» ortalyǵy jaryqqa shyǵarǵan sheteldegi qazaq dıasporasyna arnalǵan ámbebap oqýlyqtarmen ótkiziledi.
– Oqytýshylar jyl saıyn arnaıy biliktilik kýrstaryna qatysyp, ózderiniń til oqytý ádistemelerin jetildirip otyrady. Sonymen qatar biz sheteldegi oqytýshylarymyzben birlese qazaq tili oqýlyqtaryn jazý tájirıbesin tuńǵysh ret qolǵa aldyq. Bıyl sonyń alǵashqy nátıjesi – «Túrik azamattaryna arnalǵan qazaq tili oqýlyǵynyń» A1 deńgeıin usynbaqpyz. Keler jyly da bul tájirıbe jalǵasyp, shetel azamattary úshin birneshe oqýlyq jaryq kórmek, – deıdi Maqpal Jumabaı.