Qazaqtyń tuńǵysh ǵaryshkeri Toqtar Áýbákirov jýrnalıstermen kezdesýinde ǵarysh saparynan kelgen soń qazaq tilinde jatyq sóıleýdi qalaı tez meńgerip alǵany týraly aıtyp berdi, dep habarlaıdy Egemen.kz.
«Qazaqstanda alǵash ret ótken Qazaq quryltaıynda sahnaǵa biraz qazaqtar shyǵyp sóz sóıledi. Men ol jıynǵa Oljas Omarulymen birge bardym. Ekeýimizdi de sahnaǵa shyǵaryp, sóz berdi. О́z kezeginde sóz alǵan Oljas Omarulyna kópshilik «Nege qazaqsha sóılemeısiń?» dedi. Sonda ol kisi: «Kelesi joly ana tilimde sóıleımin, ýáde beremin», dep maǵan buryla qarady. Men de sol kezde qazaqtardyń aldynda qazaqsha sóıleýge ýáde berdim», dedi T.Áýbákirov.
Batyr sol kezden bastap qazaq tilin án arqyly úırengenin aıtty.
«Ándi kóp tyńdadym, túsinbegen sózderimdi jazyp alyp, maǵynasyn izdedim. Osy tásil kóp kómektesti. Sodan keıin Qyzylorda halqyna alǵys aıtamyn. Sol óńirden depýtat bolyp saılanǵanda, halyqtyń ortasynda júrýim qazaqshamdy jetildirýime úlken yqpalyn tıgizdi. Solaı namysqa tyrysyp, úsh aıdyń ishinde tildi tez úırendim. Halyqtyń arasynda júrip qazaq tiliniń keńdigin, tereńdigin túsindim», dedi ol.
Eske salaıyq, jaqynda ǵaryshker «Qazaq gazetteri» JShS ujymymen kezdesti. Jıynǵa memleket jáne qoǵam qaıratkeri Oralbaı Ábdikárimov, belgili hırýrg, professor Serik Toqpanov, «Er Toqtar» kitabynyń avtory, belgili jýrnalıst Talǵat Súıinbaı qatysty.