Búgin, 2 qazan – Toqtar Áýbákirovtiń ǵaryshqa ushqan kúni. Qazaqtyń tuńǵysh ǵaryshkeri 1991 jylǵy 2 qazanda Baıqońyrdan «Soıýz TM-13» kemesimen ǵaryshqa ushqan edi. «Qazaq gazetteri» JShS ujymymen kezdesý barysynda Toqtar Ońǵarbaıuly 32 jyl burynǵy tarıhı oqıǵa týraly aıtyp berdi.
«Ǵaryshker bolam dep oılaǵan joqpyn. Ǵaryshqa ushý ol da qazaqtyń namysy boldy. Meni ǵaryshqa ushyrǵan - ulttyq namys», dedi Toqtar Áýbákirov.
1991 jylǵy 2 qazanda Toqtar Áýbákirov 45 jasynda «Soıýz TM-13» ǵarysh kemesimen «Mır» orbıtalyq keshenine ushqysh-zertteýshi retinde ushty. Ekıpaj quramynda bolǵan sovet ǵaryshkeri Aleksandr Volkov jáne avstrııalyq Frans Fıbekpen birge ǵaryshqa kóterildi.
«Qazaqstannyń tuńǵysh prezıdenti N.Nazarbaev qazaqtyń dalasynda boı kótergen Baıqońyr ǵarysh aılaǵynan 30 jylda qazaqtyń dalasynan ǵaryshqa qanshama ǵaryshker ushqanyn, alaıda, ishinde birde-bir qazaq joq ekenin aıtqan edi. Ǵaryshqa ushý qazaqtyń qolynan kelmeıtin sharýa ma?» degeni meniń namysymdy qaırady. Alty aıdyń ishinde qazaqtyń namysy úshin synaqtan ótip, ǵaryshqa ushtym. Basqa ǵaryshkerler ushý úshin synaq tapsyrý merzimin az degende eki jyl, odan da kóp ýaqyt óteıdi. Al men sol synaqty 6 aıdyń ishinde tapsyryp, qazaqtyń namysy úshin ǵaryshqa kóterildim», dedi Keńes odaǵynyń batyry, Halyq qaharmany, ǵaryshker, ushqysh Toqtar Áýbákirov.