Kúni keshe Qaraǵandyda qatty jaýǵan jańbyrdyń sońy burshaqqa ulasty. Qalanyń keı kósheleri kólge aınaldy. Jurttyń deni aıaǵymen sý keshti, kólikter belortaǵa deıin jańbyr sýyna batty. Osy bir sátte saǵattap sý ortasynda turyp, jol qozǵalysyn rettegen jol-patrýldik polısııa qyzmetkerlerine el rıza boldy.
Keshkilik Gogol men Ábdirov kósheleriniń qıylysyndaǵy baǵdarsham tehnıkalyq aqaýdan óship qalǵan. Keptelis boldyrmaý úshin jol-patrýldik polısııa qyzmetkerleri jedel jetip, kólikterge baǵyt-baǵdar bergen. El yqylasyna bólengen ekeý – Qaraǵandy polısııa basqarmasynyń patrýldik polısııa polkiniń qyzmet ınspektory, aǵa leıtenant Baǵdat Bekmaǵambetov pen polısııa ınspektory Ernat Jarqynbekov. Jigitter jarty saǵat saıyn aýysyp otyrǵan. Sol bir sátti vıdeoǵa túsirip alǵan jeli qoldanýshysy áleýmettik jelilerge júktegen.
«Biz qyzmetke kiriserde ant beremiz. Adal qyzmet etýge. Jańbyr sýy salqyn bolsa da, shydadyq. Bastysy, mindetimizdi atqardyq. Bar bolǵany sol», deıdi Baǵdat Maratuly.
Minsiz qyzmet etýdi maqsat etken eki tártip saqshysy osylaısha álemettik jeli qoldanýshylarynyń oń yqylasyna bólenip júr.
Qaraǵandy oblysy