Qańtar oqıǵasy kezinde Almatyda 291 ǵımarat qıratyldy. Onyń ishinde, ákimshilik, densaýlyq saqtaý nysandary, aýdandyq polısııa basqarmalary men polısııa beketteri de bar. Jappaı tártipsizdik kezinde búlingen turǵyn úıler jóndeldi. Alaıda órtke oranyp, tonalyp, qıratylǵan qalalyq ákimdik ǵımaratynyń sáýlet kelbetin saqtaı otyryp, qalpyna keltirýge baqandaı eki jylǵa jýyq ýaqyt ketti.
О́tken seısenbi kúni BAQ ókilderi tolyq jóndelgen, qaıta túlegen qala ákimdiginiń ǵımaratyn kórýge bardy. Táýelsizdigimizdiń tańyna kýá bolǵan tarıhı nysandy qalpyna keltirý jumystary Memleket basshysynyń tapsyrmasymen 2022 jyldyń aqpan aıynda bastalǵan edi. О́ıtkeni «Qaraly qańtar» kúnderinde ákimdiktiń 6 qabaty, 4 pavılony órtke oranǵan. Sol kezde jertóldegi órtke qarsy júıe iske qosylyp, shylqyp sýǵa batqan ǵımarattyń 80 paıyzy jaramsyz bolyp qaldy. Qazirgi tańda Almaty ákimdigi ǵımaratynyń tarıhı kelbeti saqtala otyryp, zamanaýı tehnologııa men qurylys standarttarymen jańǵyrtyldy. Qasbettegi juldyzdyń ornyna beıbitshilik tutastyǵynyń, memleket pen otbasy negiziniń ulttyq sımvoly bolǵan shańyraq beınesi paıda boldy. Eń bastysy, kúrdeli jóndeý jumystary kezinde aldymen ákimdik qyzmetkerleri men kelýshileriniń qaýipsizdigi eskerildi.
QazQSǴZI sarapshylary ǵımarattyń zilzalaǵa tózimdiligin zerttep, naqty usynystardan keıin seısmıkalyq kúsheıtýdiń barlyq amaly tolyq júrgizilip, órt qaýipsizdigi sharalary saqtaldy. Endigi jerde ǵımarattyń ishki bezendirilýinde otqa tózimdi, janbaıtyn materıaldar paıdalanylyp, buryn bolmaǵan jańa tútin shyǵarý júıesi, órttiń mekenjaı júıesi-eskertý ornatyldy. О́rt kezinde jalynnyń taralýyna jol bermeıtin arnaıy qaqpaqtar birden iske qosylady. Oǵan qosa qaýipsizdik sharalaryn kúsheıtý maqsatynda ǵımaratqa kirýdi baqylaý júıesi, otqa tózimdi esikter, ǵımaratqa birinshi qabattaǵy terezeler arqyly ruqsatsyz kirýdi shekteıtin qosymsha japqyshtar, ár qabatty aınaldyra beınebaqylaý kameralary ornatyldy. Qyzmetkerlerdiń kirýi úshin týrnıket qurylǵysyna taný júıesi ornatylǵan.
Qurylys barysynda tıimdi energııa tutyný tehnologııasy qoldanylyp, jańa jylytý júıesine tolyǵymen aýystyryldy. Barlyq ınjenerlik kommýnıkasııa avtomattandyrylǵan jáne biryńǵaı dıspetcherlik pýnktke qosylǵan. Bul jumysty baqylaýǵa, energııa tıimdiligin qamtamasyz etýge múmkindik beredi. Dıspetcherler ozyq úlgidegi stansanyń kómegimen barlyq júıeni basqarady, tótenshe jaǵdaı týyndaǵan kezde jedel áreket etedi.
Ǵımaratty qalpyna keltirýdiń taǵy bir mańyzdy ólshemi – ınklıýzıvti sheshimder. Atap aıtqanda, múmkindigi shekteýli jandarǵa arnalǵan jedel satylar, elektrkótergishter, múgedekterge arnalǵan jýynatyn bólmeler men qozǵalýy qıyn adamdarǵa arnalǵan qurylǵy – tańbalaý, pandýstar, shaqyrý túımeleri, Braıl álipbıi de paıda boldy. Ákimdiktiń birinshi qabaty «Open space Almaty» bolyp qaıta jańartyldy. Munda qabyldaý bólmesi, kútý aımaǵy, kelissózder, halyqty qabyldaý, ana men bala, balalarǵa arnalǵan oıyn alańy bar qoǵamdyq qabyldaý bólmeleri ornalasqan. Ǵımarattyń jalpy aýmaǵy – 33 myń sharshy metrden astam, 700 orynǵa eseptelgen 360 kabınet bar. Kúrdeli jóndeýlerden keıin de kabınetterdiń aýdany ózgerissiz qalǵan. Ǵımaratta 14 basqarma men ákim apparaty ornalasady. Ǵımarattyń tarıhı kelbeti 99 paıyz saqtaldy.
Sol sııaqty jobany iske asyrý barysynda óz elimizde jasalǵan jıhazdar men basqa da sándik buıymdardy satyp alýǵa mán berilgenin atap ótken jón. Qasbettiń joǵarǵy jaǵyndaǵy «juldyzdy» «shańyraqpen» aýystyrý ulttyq naqyshty ulyqtaý maqsatynda qabyldanǵan sheshim ekenin túsindirip otyrýdyń ózi artyq. Al muny jańa dáýirdiń, jaqsylyqtyń nyshany dep bileıik.
ALMATY