Premer-mınıstr Álıhan Smaıylov Shyǵys Qazaqstan oblysyna jumys sapary barysynda Rıdder qalasyndaǵy JEO-ny jóndeý-qalpyna keltirý jumystarymen tanysty, dep habarlaıdy Egemen.kz Úkimettiń baspasóz qyzmetine silteme jasap.
Shyǵys Qazaqstan oblysy ákiminiń orynbasary Baqytjan Baıahmetovtiń aıtýynsha, búginde stansııadaǵy 6 qazandyqtyń 2-ýi iske qosylǵan. Jaqyn arada taǵy 1-eýi iske qosylyp, turǵyndardyń jylýmen tolyq qamtamasyz etiletini kútilip otyr. Sonymen qatar qalǵan agregattar men qosalqy jabdyqtardy jóndeý-qalpyna keltirý jumystary júrgizilip jatyr.
Jalpy, búginde mazýt sorǵy stansııasyn, otyn berý traktisin, týrbogenerator jáne baılanys transformatorlaryn jóndeý, jylý jelilerinde gıdravlıkalyq rejımdi qamtamasyz etý úshin sorǵy stansııalaryn elektrmen jabdyqtaýdy qalpyna keltirý jumystary aıaqtalǵan. Qazandyq pen týrbınalyq sehtardyń shatyry jóndeldi. Kómir tasymaldanatyn temirjoldardy jóndeý jumystary da aıaqtalýǵa jaqyn.
Premer-mınıstr ótken jylytý maýsymynda Rıdder JEO apatty jaǵdaıda jumys istep, jıi toqtap qalǵanyn, nátıjesinde turǵyndar qystyń kózi qyraýda jylýsyz qalǵanyn atap ótti.
«Buǵan burynǵy qojaıyndardyń stansııany jańǵyrtý men jóndeý jumystaryna qarajat salmaǵany sebep boldy. Osynyń barlyǵy JEO-nyń ábden tozýyna ákep soqty. Respýblıkalyq bıýdjetten 8,4 mlrd teńge bólýge májbúr boldyq. Oblys ákimdigi óz tarapynan 500 mln teńgege jýyq qarjy bóldi. Osy ýaqytqa deıin jóndeý jumystary toqtaýsyz júrgizildi. Aldaǵy jylytý maýsymynyń durys ótýi úshin olardyń ýaqtyly aıaqtalýy mańyzdy. Muny kúni-túni qadaǵalap otyrýymyz kerek», dedi Álıhan Smaıylov.
Ol sondaı-aq JEO-ny kommýnaldyq menshikke berý prosesin jedeldetýdi tapsyrdy.
Nysanda Premer-mınıstrge aımaqtyń jylý berý maýsymyna daıyndyǵy týraly da baıandaldy. Búgingi tańda bıýdjettik uıymdardy (830-dan astam nysan), turǵyn úılerdi (3 myńnan astam), ınjenerlik jeliler men qazandyqtardy daıyndaý jumystary aıaqtalǵan. JEO men sý elektr stansııalarynda da daıyndyq jumystary aıaqtalýǵa jaqyn.