Eńbekshiqazaq aýdanynyń Túrgen aýylyndaǵy M.V.Lomonosov atyndaǵy mektep pen Aqshı aýylynda ornalasqan Bólek batyr mektebiniń «Jas búrkit» áskerı-patrıottyq klýbynyń oqýshylary 6654 áskerı bólimine kelip, quqyqtyq tártip áskeriniń ómirimen tanysty.
«Jas búrkit» áskerı-patrıottyq klýbynyń maqsaty – óskeleń urpaqtyń boıyna otansúıgishtik sezimin qalyptastyrý jáne olardyń týǵan jerge, elge degen súıispenshiligin oıatý. Áskerı klýbtyń qyzmetine, sondaı-aq jastardy patrıottyq rýhta tárbıeleý isine 6654 áskerı bólimi komandıriniń TjÁQJ jónindegi orynbasary, polkovnık Jandos Kólbaevtyń da qosqan úlesi zor. Is-shara aıasynda Jandos Jamalulynyń uıymdastyrýymen mektep oqýshylaryna arnap sporttyq is-sharalar ótip, áskerı tehnıkalyq, qarý-jaraq kórmesi tanystyryldy.
– Tárbıe – otbasynan bastalady. «Uıada ne kórseń, ushqanda sony ilersiń» degen maqal osy sózimizdiń dáleli. «Jas búrkit» áskerı-patrıottyq klýbynyń oqýshylaryn áskerı bólimde kórgenimizge óte qýanyshtymyz. Sebebi jas urpaqtyń boıyna patrıottyq sezimdi qalyptastyryp, olardy eńbekke, Otandy súıýge baýlý – bizdiń mindetimiz. Eline adal qyzmet etetin jastardy tárbıeleý – basty múddemiz. Klýbtyń da kózdegen maqsaty sol, – degen polkovnık J.Kólbaev 6654 áskerı bólimi áskerı-patrıottyq klýb basshylyǵymen tyǵyz qarym-qatynas jasaıtynyn jáne ári qaraı da jemisti eńbek ete berýge múddeli ekenin jetkizdi.
– Oqýshylardyń áskerı ómirge degen qyzyǵýshylyqtary janarlarynan baıqalyp tur, olar úshin barlyǵy qyzyq. «Qarý-jaraqty qalaı paıdalaný kerek?», «Áskerı tehnıkanyń qyzmeti qandaı?» degen suraqtar qoıyp, pikirtalas órbitti. «Áskerı kıim kıgen kezde boıymyzda maqtanysh sezimi paıda bolady» dep sezimderimen bólisip jatqan balalardy kórgen sátte olarmen atqarylatyn jumystyń sátti bolatynyna senimim mol. Sondyqtan mundaı is-sharalardy jıi uıymdastyryp turý qajet, – dedi ol.
Quralaı JUMAQYZY
Almaty oblysy