Astanadaǵy «Alaý» muz aıdynynda Olımpııa oıyndarynyń baǵdarlamasyna enetin konkımen júgirý sportynan jekeleı qashyqtyqqa jarysýdan el birinshiliginiń shymyldyǵy túrildi.
Otandyq sportshylar jyl saıyn dástúrli túrde uıymdastyrylatyn el chempıonatynyń qanshalyqty mańyzdy ekenin jaqsy túsinedi. О́ıtkeni ishki birinshilikte óz myqtylyǵymen daralanyp, bapkerlerdiń kózine túse bilgen jeńimpazdar men júldegerler aldaǵy halyqaralyq jarystarǵa, Álem kýboginiń kezeńderine qatysýǵa múmkindik alady. Sondaı-aq bıylǵy chempıonatta úzdikter qatarynan kóringen jas sportshylar kelesi jylǵy jasóspirimder arasyndaǵy qysqy Olımpıadada el namysyn qorǵaý mártebesine ıe bolady. Sondyqtan mamandar bıylǵy el birinshiliginiń ár qashyqtyqtaǵy básekeleri asa tartysty ótedi dep boljap otyr.
Elordada bastaý alǵan ishki chempıonattyń ashylý saltanatyna Týrızm jáne sport mınıstri Ermek Marjyqpaev, Astana qalasynyń Dene shynyqtyrý jáne sport basqarmasynyń basshysy Samat Jylqybaev qatysty.
«Konkı jarysy qysqy sporttyń basym túrleriniń biri sanalady. Sondyqtan da bizdiń mınıstrlik sportshylardyń oqý-jattyǵý jıyndaryn uıymdastyrýmen, olardyń halyqaralyq jarystarǵa qatysýyn qamtamasyz etýmen, sondaı-aq Qazaqstanda halyqaralyq jáne respýblıkalyq jarystardy ótkizýmen belsendi aınalysyp keledi», dedi E.Marjyqpaev.
Bıylǵy el birinshiligine elimizdiń 7 oblysy men Astana jáne Almaty qalalarynan kelgen 183 sportshy qatysyp jatyr. Aıta keteıik, qysqy Olımpııa oıyndarynda Halyqaralyq konkıshiler odaǵyna enetin sport túrleri (short-trek, mánerlep syrǵanaý jáne konkımen júgirý) boıynsha 28 medal jıyntyǵy sarapqa salynady.