«Kásip túbi – násip» degen. Muny jaqsy biletin aǵaıyndy Aıtnıakovtar birneshe jyl buryn bastaǵan isin keńeıtýdi oılastyryp otyr. Tehnıkanyń tilin biletin jandar osy kúnge deıin shaǵyn bólmelerdi jalǵa alyp kelgen. Sonyń ózinde turaqty tutynýshylary bar. Jýyrda aǵaıyndy kásipkerlerdiń jumys ornyna barǵanymyzda, múgedektigi bar jandardyń tabandylyǵyna tánti boldyq.
Ilnar men Ildar – Pavlodar qalasynyń týmasy. Dárigerler balalardyń serebraldy sal aýrýyna shaldyqqanyn jasqa tolmaı jatyp anyqtaǵan. Taǵdyrdyń jazýyna ne shara, bastysy, aǵaıyndylar – birine-biri qorǵan.
Qaladaǵy tehnıka jóndeıtin saýda núkteleriniń birinen shaǵyn oryn saılaǵan kásipkerlerge kelimdi-ketimdi adam kóp. Olardyń basym kópshiligi Aıtnıakovtardy burynnan tanıdy eken. Ilnar men Ildar Pavlodardan elordaǵa 2017 jyly qonys aýdarypty. Bóten qalaǵa kelgen soń, á degennen jumys izdeýge kirisken. Az ǵana ýaqytta bir emes, birneshe márte jumys aýystyrypty. Qalaı aýystyrmasyn, 70 myń teńge jalaqy 120 myń teńgege jaldaǵan páterdiń aqysyn óteýge de jetpeıdi.
«О́zim úılengenmin, eki balam bar. Áıelim zaǵıp. Úıde ózim tabys tabamyn. Ildar men anam qazir bizden bólek turady. Alǵash Astanaǵa kelgenimde birneshe kompanııada programmıst bolyp eńbek ettim. Bala kezden tehnıkaǵa áýes bolǵan soń, kompıýterlik baǵdarlamalarda jumys isteý asa qıyndyq týdyrmady. Negizi, Pavlodarda bala jastan tehnıkalardy shuqylap óstim. Ýaqyt óte kompıýter jóndeı bastadym. Bas qalaǵa kóship kelgenimizde de kompıýter jóndeıtin ortalyq ashý oıda bolǵan. Biraq birden ashý múmkin bolmady. Is qarajatqa kelip tireldi. Sóıte tura araǵa jyl salyp, baýyrymyz ekeýmiz kompıýter jóndeıtin oryndy jalǵa alyp, iske kirisip kettik. Sodan beri birneshe jyl óte shyqty. Sharýamyz shalqyp, sharyqtap kettik dep aıta almaımyz. Saılaǵan ornymyzdyń kólemi kishi boǵan soń, tek noýtbýk jóndep júrmiz. Iá, on shaqty ret jumys ornymyzdy aýystyryp júrip, turaqty tutynýshy jınap úlgergenimiz ras. Alaıda áli kúnge deıin qaladan jaıly oryn taba almaı sabylyp júrmiz», deıdi Ilnar.
Kásipkerler bastaǵan is birneshe jyl bálendeı nátıje bermese de, orta jolda qalmaı, jalǵastyrýǵa nıettenip otyr. Sebebi olar kompıýterin bir jóndetken tutynýshynyń, kómek qajet bolsa, qaıta keletinin biledi. Qyzmet kórsetý salasyndaǵy jumystyń jaı-japsarynan habary bar. Tabandy jandar nıetine, peıiline qaraı jýyrda úıli bolypty. Bir bólmeli páterdi qaıyrymdy jandar usynǵan. Ol ol ma, taıaýda Aıtnıakovtar jergilikti ákimdikten taǵy bir qýanyshty habar estigen. Onysy – ákimdiktegilerdiń kásipkerlerge qolaıly oryn saılap beremiz degen jaýaby. Ilnar men Ildar sol kúndi asyǵa kútip júrgenin aıtty.
«Bizge usynyp otyrǵan nysannyń aýdany – 120 sharshy metr. Keń ári qolaıly. Qolaıly degenim, endi biz alǵa qoıǵan basqa da josparlarymyzdy iske asyra alamyz. Mysaly, buryn kásipti bastaǵanymda ózim sekildi múgedektigi bar jandardy jumysqa shaqyrýdy oılaǵanmyn. Olarǵa qolymnan keletin isti úıretip, barynsha qoldaý kórsetýge nıettendim. Bálkim, sol armanym endi oryndalyp qalar dep úmittenemin. Menińshe, múgedektigi bar jandar úıde otyrmaı, qoǵamǵa beıimdelýi kerek. Olarǵa jaıly orta qalyptastyrýǵa qazir memleket te aralasyp jatyr ǵoı. Erekshe qabiletti jandar jigerlense, eńbek etse, jaqsy. Sonda ómirdiń mánin joǵaltpaıdy», deıdi kásipker.
Oraıly sátti paıdalanyp, Ilnarǵa kásip bastaý qıyn ba degen saýal qoıdyq. Ol tosylmaı, óz isi jaıynda aıtyp berdi.
«Kásipte básekelester kóp bolady» dep burynnan estıtinmin. Al shyn mánisinde biz tańdaǵan baǵytta da báseke joǵary eken. Áıtkenmen, sapaly qyzmet kórsetetinder saýsaqpen sanarlyq. Mysaly, biz qaıta jóndeý tıimsiz noýtbýkterdi birden qabyldamaı, egesine eskertemiz. Eskini júz jóndegennen jańasyn alýdy usynatyn kezder de bolyp turady. О́ıtkeni jóndeýge ketetin shyǵyn tehnıkanyń naryqtaǵy qunynyń jartysyna teń bolýy múmkin. Biz óz isimizdi bilemiz ǵoı, al tutynýshy odan habarsyz. Sol birdi-ekili tapsyrystan paıda tappaspyz. Biraq turaqty tutynýshydan aıyrylmaımyz. Buzylǵan tehnıkany jóndeýge áýes jastarǵa aıtarym, bul kásip jyldan-jylǵa qalyp bara jatyr. Tutynýshylar eski noýtbýkti jóndegennen nesıege jańasyn alýdy durys kóredi. Bir jaǵy olardyń qadamy da durys. Ol da tıimdi. Ázirshe biz barynsha osy baǵytta eńbek etýge tyrysyp júrmiz. Keı-keıde ashynasyń. Er-azamat bolǵasyn shydaısyń. El qatarly ómir súrýge tyrysyp júrmiz», dep sózin túıindedi Ilnar.
Ilnar men Ildar bir jyldary smartfondardy jóndeýge bekinipti. Alaıda densaýlyǵyna baılanysty telefonnyń kishigirim bólshekterin qalpyna keltirý qıynnyń-qıyny ekenin túısingen. Smartfonnyń qyr-syryn bilgenmen, is júzinde qoldan kelmeıtin sharýaǵa bel baılaýǵa júreksingen. «Árbir isti tııanaqty tyndyrmaǵan soń bári beker», deıdi kásipkerdiń ózi. Iá, árbir tutynýshynyń alaqanyna salyp alyp kelgen amanatyn ańdamaı búldirip alý degendi oılaýdyń ózi qıyn.
Áńgime barysynda Ilnar kásipti keńeıtýge bel baılap otyrǵandaryn aıtqan edi. Talapty aǵaıyndylar ázirge noýtbýkpen qosa turmystyq tehnıkalardy jóndeýge kirisýdi kózdep otyr. О́zderi oılaǵandaı, múgedektigi bar azamattardy jumysqa shaqyrmaq nıette. Keıin, isi alǵa basyp jatsa, shaǵyn da bolsa elektronıka dúkenin ashý oıda bar eken. Al ázirshe kásipkerler jaqyn arada beriledi degen nysandy asyǵa kútip júr.