Búgingi tańda balalardyń qaýipsizdigi, olardyń densaýlyǵy men qorǵalýy, ál-aýqaty, bilimi men áleýmettik jaǵdaıy – basty nazarda. Bul týraly Prezıdent: «Álemde balalardyń baqyty men kúlkisinen mańyzdy eshteńe joq. О́skeleń urpaqtyń jan-jaqty damýy úshin qolaıly jaǵdaılar jasaý – árqashan bizdiń memleketimizdiń basty mindetteriniń biri», degen edi.
Elimizde kóptegen otbasy balalardy tolyqqandy tárbıeleý men damytý, olardyń ál-aýqatyn qamtamasyz etýge qolaıly jaǵdaı jasaı almaı otyr. О́kinishke qaraı, zertteýlerdiń nátıjesi qoǵamda otbasy ınstıtýty álsirep, ǵasyrlar boıy qalyptasqan ultymyzǵa saı otbasylyq qundylyqtar men dástúrlerdiń joǵalyp bara jatqanyn anyqtady. Bul olqylyqtyń ornyn bilim berý uıymdary ata-analarmen birlesip toltyrmaqshy. Bala tárbıesinde otbasynyń róli zor. Oqý-aǵartý mınıstri Ǵanı Beısembaevtyń aıtýynsha, sapaly bilimdi, patrıotızmdi, naǵyz maman bolýdy, únemshildik pen eńbekqorlyqty qalyptastyrýǵa oqýshy – muǵalim – ata-ana birlese jumys atqarýy shart. Sol sebepti mınıstr tárbıe jumysynyń rólin kúsheıtý maqsatynda respýblıkadaǵy mektepterde 1 qyrkúıekten bastap ata-analardy pedagogıkalyq qoldaý ortalyǵyn ashýdy tapsyrǵan.
Mańyzy bar jobanyń mindeti – balalardyń ál-aýqatyn qamtamasyz etýge ata-analardyń pedagogıkalyq mádenıetin, psıhologııalyq jáne áleýmettik quzyretin damytý. Ashylǵanyna eki aı bolǵan ortalyq oqý jylynyń sońyna deıin ata-analarǵa ulttyq qundylyqtarǵa negizdelgen segiz sabaq ótkizedi. Bul sabaqtarda ertegi, ańyz-áńgimeler, batyrlar jyrlarynan úzindiler keltirý, maqal-mátelder, halyq ánderi, dala dilmarlarynyń sheshendik sózderi, jyraýlar shyǵarmashylyǵy, salt-dástúrler men ǵuryptardyń, ulttyq kıimderdiń mańyzy, urpaqtar tizbegi (shejire), er men áıeldiń qoǵamdaǵy orny, týystyq qatynastardyń erekshelikteri qamtylady. Sonymen qatar joba aıasynda «Danalyq mektebi» klýby quryldy. Klýb mekteptiń naqty suranystaryna sáıkes «Ata ósıeti», «Áje danalyǵy», «Aǵa qamqorlyǵy», «Jeńge keńesi» sekildi seksııalardy uıymdastyrý arqyly ultymyzǵa tán týystyq qarym-qatynastardy urpaq boıyna sińirýdi maqsat etedi.
Erkenaz QORDABAI,
L.N.Gýmılev atyndaǵy EUÝ stýdenti