Túrki memleketteri uıymynyń stýdent sportshylary arasyndaǵy II Túrki ýnıversıadasy óz máresine jetti. Baýyrlas elderdiń sportshy órenderiniń basy qosylǵan Túrkistandaǵy dúbirli dodaǵa Qazaqstan, Ázerbaıjan, Qyrǵyzstan, Majarstan, О́zbekstan men Túrkııa elderinen 500-den asa jas qatysyp, tórt kún boıy sporttyń jeti túrinen ózara baq synasty. Sporttyq oıyndar «Olympic Senter» sport kesheni men Q.A.Iаsaýı atyndaǵy Halyqaralyq qazaq-túrik ýnıversıtetiniń bazasynda ótkizildi.
Ýnıversıadanyń ashylý saltanatynda Túrki memleketteri uıymy bas hatshysynyń orynbasary Sadı Djafarov, Qazaqstan Respýblıkasynyń Ǵylym jáne joǵarǵy bilim mınıstri Saıasat Nurbek quttyqtap, saıysqa qatysýshylarǵa sáttilik tilegen edi. Al Túrkistan oblysynyń ákimi Darhan Satybaldy túrki elderiniń basyn qosqan sport dodasynyń mańyzdy ekenin atap ótti.
«Túrki elderiniń ekinshi ýnıversıadasy joǵary deńgeıli halyqaralyq jarysqa aınalyp otyr. Búgin túrki áleminiń 6 memleketinen talantty sportshylar jınaldy. Sizder – san ǵasyrlar álemdi moıyndatqan Er túriktiń urpaǵysyzdar! Osydan 3 kún buryn elordamyz Astanada Túrki memleketteri uıymynyń onynshy sammıti ótti. Oǵan túrki memleketteriniń basshylary qatysyp, baýyrlas elder arasyndaǵy tatýlyqty nyǵaıtý jolyndaǵy mańyzdy sheshimder qabyldady. Ekinshi Túrki ýnıversıadasynyń da maqsaty osy. Biz barlyq baýyrlas eldermen jan-jaqty qarym-qatynasty nyǵaıtý úshin bar kúsh-jigerimizdi salamyz. Túrki elderin jaqyndatatyn aýqymdy jobalardy jalǵastyramyz», dedi D.Satybaldy.
Sondaı-aq oblys ákimi jarysty tarıhı shaharda ótkizýge qoldaý kórsetkeni úshin Túrki memleketteri uıymy men Ǵylym jáne joǵary bilim mınıstrliginiń basshylyǵyna alǵysyn bildirdi.
Baýyrlas elder jastarynyń birligin bekemdeý, ortaq mádenıet pen tarıhymyzǵa qyzyǵýshylyǵyn arttyrýdy maqsat etken jarystyń qorytyndysy boıynsha voleıboldan erler men áıelder arasynda qazaqstandyq stýdentter úzdik atandy. Ýnıversıadanyń dzıýdo jáne erkin kúres sport túrlerinen, ásirese Q.A.Iаsaýı atyndaǵy Halyqaralyq qazaq-túrik ýnıversıtetiniń sportshy jastary joǵary kórsetkishke qol jetkizdi. Qazaqstan komandasynyń quramyndaǵy ýnıversıtettiń 5 stýdentiniń tórteýi jeńis tuǵyrynan kórindi. Fýtzaldan Qyrǵyzstannan kelgen komanda, al shahmattan О́zbekstan jastary birinshi orynǵa ıe boldy. Erkin kúresten Qazaqstan alǵa shyqsa, dzıýdoda ózbek jáne ázerbaıjan stýdentteri kósh bastady. Al grek-rım kúresinde Túrkııa eliniń balýandary basqa qurama sportshylaryna ese bermedi. Erler arasyndaǵy ústel tennısi boıynsha Majarstan, qyzdar arasynda Túrkııa komandasy jeńimpaz atandy.
Q.A.Iаsaýı atyndaǵy HQTÝ-da ótken saıystyń jabylý saltanaty Ǵylym jáne joǵary bilim mınıstri Saıasat Nurbektiń quttyqtaý beınerolıgimen bastaldy.
«Bul saıys sporttyq básekemen qatar, shynaıy dostyqtyń da jarqyn úlgisin kórsetti. Túbi bir túrki halqynyń tarıhy men dástúri, qýaty barshamyzǵa ortaq myǵzymas qundylyq ekeni sózsiz. Bul saıysta túrki jurtynyń dostyǵy men shynaıy baýyrmaldyǵy jeńiske jetti dep esepteımin», delingen mınıstr tileginde.
Al Túrkistan qalasynyń ákimi Nurbol Turashbekov ýnıversıadaǵa qatysqan sportshylardyń árbiri óz eliniń maqtanyshy, úmit artqan urpaǵy, túrki elderi jastarynyń túrki memleketteriniń rýhanı astanasy – Túrkistanda bas qosýy úlken mártebe ekenin atap ótti. Saltanatty rásim barysynda Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti tóraǵasynyń orynbasary Aqerke Abylaıhanqyzy men Qazaqstan Ulttyq stýdenttik sport odaǵynyń vıse-prezıdenti Muhtar Esqalıev III Túrki ýnıversıadasyn ótkizý úshin týdy Qyrǵyzstan Respýblıkasy ókildigine saltanatty túrde tabys etti.
TÚRKISTAN