Qazaqstan Qorǵanys mınıstrliginiń delegasııasy Kenııa astanasy Naırobıde ótken Halyqaralyq bitimgerlik daıyndyq ortalyqtary qaýymdastyǵynyń (IAPTC) 27-konferensııasyna qatysty.
Halyqaralyq beıbitshilikti qoldaý oqý ortalyǵynda 80 memlekettiń bitimgerlik daıyndyq ortalyqtarynan 300-den asa ókil jınaldy. Konferensııa delegattary kúrdeli bitimgerlik operasııalarǵa bitimgerlerdi daıarlaýdaǵy seriktestiktiń rólin talqylady.
– Konferensııaǵa qatysý bitimgerlik qyzmet salasyndaǵy aǵymdaǵy úrdistermen jáne talaptarmen tanysýǵa, jańa baılanystar ornatýǵa múmkindik berdi. Qoldaǵy bar málimetterdi eskere otyryp, biz ulttyq bitimgerlik kontıngentin daıyndaý baǵdarlamasyn ýaqtyly beıimdeı alamyz, – dedi Bitimgerlik daıyndyq ortalyǵynyń basshysy, polkovnık Baýyrjan Nyǵmetýllın.
Is-shara birinshi kezekte bitimgerlik áleýetti arttyrýǵa, halyqaralyq uıymdardyń, úkimetterdiń jáne tótenshe jaǵdaılarǵa den qoıý tıimdiligin arttyrýǵa múddeli jergilikti bılik ókilderiniń strategııalyq yntymaqtastyǵyn baǵalaýǵa jáne ony damytýǵa baǵyttalǵan.
Bitimgerlik daıyndyq ortalyqtarynyń halyqaralyq qaýymdastyǵy 1995 jyly qurylǵanyn aıta ketý kerek. Trenıngter, bilim berý baǵdarlamalary men zertteý bastamalarynyń arqasynda búkil álemniń bitimgerlik daıarlaý ortalyqtary 190 elden 50 myńnan astam bitimgerdi sátti daıarlady.