Halyq medısınalyq tekserýden ótýdi qıynsynyp jatady. Sebebi ýaqyt kóp alady, jumysy da kóp. Sodan bolar bul paraqty medısınalyq qyzmetkerler satyp, halyq ony alyp jatady. Bul máseleniń aldyn alý úshin zańger, kásipker Shyńǵys Qulahmetov medısınalyq tekserýden ótýdiń avtomattandyrylǵan júıesi Med365-ti óndiriske eńgizgen.
Med365 – adam densaýlyǵyna zııandy óndiristerde jumys isteıtin qyzmetkerlerge aýysym aldynda nemese aýysymnan keıingi medısınalyq tekserýden 1 mınýt ishinde ótýge múmkindik beretin sheshim. Alynǵan derekterdi taldaıtyn jáne densaýlyqqa tónetin qaýipti anyqtaıtyn arnaıy baǵdarlamalyq jasaqtamadan turady. Munyń bári termometr, tonometr, alkotester, pýpıllometri bar avtomattandyrylǵan medısınalyq tekserý júıesi ASMO-nyń kómegimen jasalady. Barlyq derekter arnaıy júıege túsip, ony jasandy ıntellekt óńdeıdi. Sosyn dárigerlerge adamnyń densaýlyǵyndaǵy máseleler týraly dabyl beredi. Qazir ujymda 30-dan astam adam jumys isteıdi. Búginde bul qurylǵyny «Samuryq-Qazyna» ınvestısııalyq holdıngi, «Qazatomónerkásip» ulttyq atom kompanııasy» aksıonerlik qoǵamy, «QazTransOıl» aksıonerlik qoǵamy, «AlmatyElektroTrans» jáne basqalary qoldanady.
Derekterge súıensek, elimizde qaýipti jáne zııandy óndiristerde 1,5 mıllıon adam jumys isteıdi. Olardyń bári kún saıyn medısısnalyq tekserýden ótýge tıis. Al Med365 jumys berýshige kún saıyn jańartylatyn aqparat berip otyrady. Naqty densaýlyq jaǵdaıy men belgili bir aptadaǵy, aıdaǵy nemese jyldaǵy kórsetkishterdi ońaı kórýge bolady.
– Qanshama adam aýysym aldynda nemese aýysymnan keıin medısınalyq kýálandyrýdan ótýge mindetti. Reglament boıynsha oǵan 1 saǵat bólinedi. Mine, 600 júrgizýshi bar flotta osyndaı ýaqyt ishinde barlyǵyn qalaı tekserýge bolatynyn elestetip kórińizshi? Úderis tek formaldylyqqa aınalady. Sonda qanshama adam tekserýsiz ruqsat alady. Biraq bul durys emes, óıtkeni avtobýs júrgizýshileri kún saıyn myńdaǵan adamdy tasymaldaıdy. Olardyń densaýlyǵy jolaýshylar qaýipsizdi úshin mańyzdy. Biz bul máseleni sheshkimiz keldi, – deıdi Sh.Qulahmetov.
Jabdyqty ornatpas buryn, kásiporynnyń barlyq qyzmetkeri baǵdarlamaǵa tirkeledi. Jeke derekterdi júkteıdi jáne adam túrin anyqtaýǵa múmkindik beretin Face ID úshin sýretke túsedi. Med365 tehnıkalyq dırektory Ashat Shákenov qurylǵynyń Face ID ıdentıfıkatoryn eshkim aldaı almaıdy deıdi.
– О́nimdi synaǵan kezde taný júıesine ártúrli ult ókilderiniń 700 myń fotosýreti júkteldi. Bul jumysshylardy aınymaı tanýǵa kómektesedi. Bizde bir kásiporynda egizder boldy, biraq baǵdarlama olardy esh qıyndyqsyz tanyp, ajyrata bildi. Sáıkestendirýden keıin tekseristen reglament boıynsha ótýge bolady. Tynys tekseretinge úrlep, qan qysymyn ólsheýge bolady. Eń qyzyǵy – pýpıllometr. Onyń kómegimen sharshaý dárejesi belgilenedi jáne esirtkige degen kúdik tekseriledi. Derekter kompıýter, feldsher nemese medbıkege jiberiledi. Olar densaýlyq jaǵdaıyn baǵalaıdy jáne jumysqa ruqsat berý-bermeý týraly sheshim qabyldaıdy. Sońǵy sózdi maman aıtady, – dep qurylǵy jumysyn túsindirdi A.Shákenov.
Shyńǵystyń qalaýy – qurylǵyny 100 paıyz otandyq ónim etý. Ázirge shetelden úsh bólikti satyp alady: tonometr (Japonııadan), alkotester (Ońtústik Koreıadan) jáne monıtor (Qytaıdan). Qazir barlyq jıyntyqtaýyshtardy elden óndirý múmkindigin pysyqtap jatyr. Taǵy bir qolǵa alǵan máselesi – ońtaılandyrý. Kóbine medısınalyq tekserýden ótkizý úshin kompanııa feldsherlerdiń úlken shtatyn ustaıdy. Olarǵa jalaqy tóleýi kerek, salyq tóleýi kerek, qandaı da bir jolmen baqylaýy kerek. Qysqasha aıtqanda, shyǵyny kóp. Al ASMO-nyń úsh-tórteýin ornata otyryp, qarjy men ýaqyt únemdeledi.
Bul komanda tolyqqandy medısınalyq aqparattyq júıeni jasaǵysy keledi. Aýysym aldyndaǵy jáne aýysymnan keıingi tekserýlerdi ǵana emes, barlyq ónerkásiptik medısınany qamtymaq oılary bar. Onyń ishine saqtandyrý, kásibı tekserý, eńbekti qorǵaý jáne gıgıenany sıfrlandyrý kiredi.
Shyńǵys Qulahmetov MedTech-ti beker tańdamaǵan. Shyńǵystyń 18 jasynda ákesi ınfarkt saldarynan qaıtys bolǵan. Sodan bastap elimizdegi aǵa býynnyń óz-ózine uqypty qaraý mádenıeti joq ekenin túsingen. Dál osyndaı úrdisti ol óz zamandastarynan da jıi baıqaıdy eken. Onyń aıtýynsha halyq dárigerge barmaýdyń ártúrli sebepterin oılap taýyp jatady. Sondyqtan da olar densaýlyq saqtaý júıesiniń jumysyn sapaly qalyptastyrýǵa jáne nasıhattaýǵa kómektesip júr.