Dosymjan Tańatarov «Uıqym kelmeıdi» baǵdarlamasynda «Jastar teatrynyń» dırektory qyzmetinen nege ketkenin aıtyp berdi, dep habarlaıdy Egemen.kz.
«Bul jaqyn kúnderi ǵana sheshilgen dúnıe. Teatr salasynda 2,5 jyl júrippin. Ádil Ahmetovtyń kezinde 2 jyl orynbasar boldym. Ádildiń 2 jyldyń kóleminde kóptegen dúnıelerden qoly qaǵylyp jatty. Ony ózim de kórip júrdim. Teatrdy qurǵan Nurqanat aǵamyz sol eki jyldyń ishinde meni synap, baıqap júrgen bolýy kerek. Aǵamyzdyń bir aıtqan sózi bar: «Biz seni úlken ánshi retinde, úlken azamat retinde biletinbiz, endi úlken aǵa, jaqsy ini ekenińe kózimiz jetti» degen edi. Dırektorlyq qyzmette jergen kezde Ádil kóptegen dúnıelerinen qalyp ketip jatty. Ádildiń suraýymen meni dırektorlyqqa tapsyraıyq degen usynys tústi. Ol kezde jaqsy dep birden qýana kettik. Ádil Ahmetov qazir eldiń aýzynda júrgen úlken akter. Sol kóp dúnıelerden qalyp jatqanda bir kómegim osy bolsyn dep keliskenmin», deıdi ánshi.
Al endi teatr basshylyǵynan ketýge onyń jeke shyǵarmashylyǵy men senim artyp tapsyrylǵan qyzmetti qatar alyp júre almaýy sebep bolǵan eken.
«Teatr dırektory bolǵannan keıin onyń ósýine, órkendeýine ákimshilikpen, qoǵammen tikeleı baılanysta bolý kerek. Azdy-kópti jumys istedik. Biraq baıqasam ózimniń shyǵarmashylyǵym aqsap bara jatyr. Teatrdyń jaýapkershiligi ózińde bolǵannan keıin kóp jerge bara almaı qalady ekensiń. Sondyqtan shyǵarmashylyqpen qyzmet birdeı alyp júre almaıtyn dúnıe bolǵannan keıin kelisimmen aldylarynan óttim. Onyń ústine qazirgi dırektordyń mindetin atqaryp júrgen Azamat Esqulov baýyrymyz keldi. Ony men úsh aıdaı kúttim. Ol ózi osy qyzmetti ári qaraı jalǵastyrýǵa qulshynys bildirdi. Kollektıvtiń barlyǵy Azamatqa senim artty. Biraz jyl jumys istegennen keıin alyp ketetin sekildi boldy. Sodan keıin men jumysty Azamatqa tapsyryp, ózimniń shyǵarmashylyǵyma bet burdym», deıdi D.Tańatarov.
Aıta keteıik, ánshi, Qazaqstannyń eńbek sińirgen qaıratkeri Dosymjan Tańatarov Astanadaǵy «Jastar teatrynyń» dırektory qyzmetine 2023 jyldyń 5 mamyrynda taǵaıyndalǵan edi.