Týrızm jáne sport mınıstri Ermek Marjyqpaev Hanchjoýda (Qytaı) ótken jazǵy Azııa oıyndarynan keıin federasııa basshylyǵy men bas bapkerlerdiń esebin tyńdaýdy jalǵastyryp jatyr. Búgin boks pen dzıýdo federasııalarynyń ókilderi men ulttyq quramanyń bas bapkerleri jazǵy Azııa oıyndaryndaǵy kóńil kónshitpeıtin kórsetkishke qatysty óz ýájin aıtty, dep habarlaıdy Egemen.kz osy salanyń baspasóz qyzmetine silteme jasap.
Mınıstr boksshylardyń fızıkalyq háne fýnksıonaldyq daıyndyǵyn kem soqqanyn synady. «О́zimiz de tamashaladyq, boksshylar ekinshi raýndtan keıin demigip qalady. Federasııa usynys aıtyp shetelden maman da shaqyrtty, biraq nátıje maqtanarlyq emes. Áıelder boksynda tipti izbasar boksshy, ıaǵnı ulttyq quramada rezerv joq. Bir boksshy barlyq týrnırge qatysyp, kúshin sarqıdy», dedi E.Marjyqpaev. Dzıýdoshylarymyzdyń da Hanchjoýdaǵy jazǵy Azııa oıyndarynda maqtaıtyndaı jetistikke jetpegenin aıtty. Tipti Tájikstan, Qyrǵyzstan balýandary 1, О́zbekstan dzıýdoshylary 3 altyn medal oljalaǵan Hanchjoý tórinde bizdiń jigitterdiń jigersizdigine qynjyldy.
«Sońǵy onjyldyqta dzıýdodan ulttyq qurama salystyrmaly túrde bir deńgeıde óner kórsetip keldi. Eldos Smetovtiń jetistikteri federasııany alǵa tartty. Biraq qazir onyń jasyna saı kúsh-jigeri azdap sarqyla bastaǵanda ulttyq quramanyń shynaıy deńgeıi belgili boldy», dedi mınıstr.
Endigi meje – segiz aıdan keıin túńligi túriletin Parıj jazǵy Olımpıadasy. Mınıstr mańyzdy básekege tyńǵylyqty daıarlyq júrgizý úshin keshendi jospar túzýdi mindettedi.