Elimizdiń mádenı, týrıstik, iskerlik belsendiliginiń ortalyǵy Almaty qashanda taý baýraıyndaǵy kórkem tabıǵatymen erekshelenip keledi. Alaıda keıingi jyldary mamandar qala ekologııasynyń nasharlaýyna qatysty dabyl qaǵyp jatyr.
Qala aglomerasııasynyń ulǵaıýy, kólik sanynyń artýy, ınfraqurylym aýqymynyń artýy, qurylystyń qarqyn alýy jasyl-jelekti alqaptardyń azaıýyna ákep soǵyp jatyr. Saldarynan ekologııalyq ál-aýqaty máselesi birinshi orynǵa shyǵyp otyr. Qorshaǵan ortanyń lastanýy estetıkalyq ǵana emes, sonymen qatar sanıtarlyq-gıgıenalyq ahýalǵa keri áserin tıgizedi.
Osy oraıda qala basshylyǵy jasyl-jelekti kútip-baptaýdyń ǵylymı zertteý baǵyttaryna kóńil bóle otyryp, Qazaq ulttyq agrarlyq zertteý ýnıversıtetimen memorandýmǵa qol qoıdy. Bul yntymaqtastyq qaladaǵy baqtar men ormandy alqaptardy jetildirýge baǵyttalǵan. Ákimdik orman pıtomnıgin qurý jobasy aıasynda jyl saıyn 300 myńnan asa kóshet otyrǵyzýdy josparlap otyr. Endigi kezekte ýnıversıtet ǵalymdary ormandy alqaptarda ǵylymı zertteý jumystaryn júrgizetin bolady.
Qazaq ulttyq zertteý ýnıversıtetiniń basqarma tóraǵasy-rektor, Ulttyq ǵylym akademııasynyń vıse-prezıdenti Aqylbek Kúrishbaevtyń aıtýynsha, qaladaǵy aǵashtardy esepke alý, qadaǵalaý, orman pıtomnıgin qurý, «Medeý» tabıǵı parkin basqarý josparyn ázirleý jáne «Baým toǵaıynyń» landshafttarynyń estetıkalyq tartymdylyǵyn arttyrý baǵyttarynda ǵalymdar qalalyq ákimdik mamandarymen birlesip jumys isteıtin bolady.
Almaty qalasynyń ákimi Erbolat Dosaev ǵalymdar bastamasyna qoldaý bildire kelip, «Medeý» tabıǵı parkin basqarýdyń besjyldyq jospary aıasynda ǵylymı, týrıstik-rekreasııalyq jáne ekologııalyq-aǵartý qyzmetin júıeleý jumystarynyń kózdelip otyrǵanyn jetkizdi.
Almaty qalasynda ornalasqan «Baým toǵaıy» memleket qorǵaýyndaǵy tabıǵı orman kesheni ári ǵylymı-tanymdyq jáne ólketaný týrızmin damytý áleýetine ıe. Munda aǵashtardyń 49 túri bar. Onyń 7 túri qylqan japyraqtylarǵa jatady. Japyraqty túrlerdiń 8 túri jumsaq, 16-sy qatty japyraqtylarǵa, 18-i jemisti jáne sándik aǵash tuqymdastaryna jatady. Joǵary shóptesin ósimdikter shamamen 118 túrdi quraıdy. Landshafttardyń estetıkalyq tartymdylyǵyn arttyrý maqsatynda «Baým toǵaıy» erekshe qamqorlyqqa alynady.
QazUAZÝ ǵalymdarynyń «Baým toǵaıyn» qaıta qurý jáne «Medeý» tabıǵı parkin basqarýdyń tıimdiligin arttyrý jónindegi ázirlengen baǵdarlamasy – aýqymdy joba. Sý, jer jáne orman resýrstary fakýltetiniń dekany, qaýymdastyrylǵan professor Talǵat Kerteshevtiń aıtýynsha, kógaldandyrý is-sharalarynyń tıimdiligin arttyrý, aǵash túrlerin tańdaý, otyrǵyzý, kútim men qaıta qalpyna keltirý, qýrap qalǵan nemese zaqymdalǵan jasyl-jelekterdi zııankesterden qorǵaý da osy jobanyń aıasynda júzege asady. Eki jylda júzege asatyn jobaǵa ýnıversıtettiń Orman resýrstary kafedrasynyń ǵalym-oqytýshylary men stýdentteri atsalysady.
Mamandar atap ótkendeı, kógaldandyrý jumystary aǵash otyrǵyzýmen ǵana shektelmeıdi. Kóshetterdi baptaý, aǵashtardyń jaı-kúıin zertteý, saraptaýǵa qatysty naqty málimetter men ekologııalyq jaı-kúıi ǵalymdar zertteýleriniń nátıjesine sáıkes anyqtalmaq.
ALMATY