Senat Tóraǵasy Máýlen Áshimbaev Ortalyq Azııa elderiniń áleýmettik kásipkerlikti damytý jónindegi alǵashqy quryltaıyna qatysty. Qyrǵyzstan, Tájikstan, О́zbekstan jáne Túrikmenstan elderinen kelgen qatysýshylar atalǵan baǵyttyń damý perspektıvalaryn talqylap, áleýmettik jobalar men óndiristerdi odan ári qoldaýǵa qatysty óz usynystaryn aıtty, dep jazady Egemen.kz.
Máýlen Áshimbaev kezdesýge qatysýshylarǵa iltıpat bildirip, el ekonomıkasynda áleýmettik kásipkerliktiń róli artyp kele jatqanyn jáne bul salanyń damýyna memleket basshylyǵy tarapynan erekshe kóńil bólinip otyrǵanyn atap ótti.
«Áleýmettik kásipkerler – memlekettik ınstıtýttardyń mańyzdy seriktesteri. Olar ekonomıkanyń damýyna jáne ózekti áleýmettik problemalardy sheshýge eleýli úles qosyp keledi. Qazirgi tańda Qazaqstanda Áleýmettik kásipkerler reestrine 200-den astam kásiporyn tirkelgen. Bizdiń elimizde áleýmettik kásipkerliktiń áleýeti áldeqaıda joǵary. Sondyqtan aldaǵy ýaqytta bul salanyń dáıekti túrde damýy jalǵasa beredi dep senemiz», degen Palata Spıkeri qatysýshylardy Qazaqstandaǵy áleýmettik kásipkerlerdi memlekettik qoldaý tetikterimen tanystyrdy.
Áleýmettik kodekstiń normalaryn talqylaý kezinde múgedektigi bar adamdardy jáne halyqtyń áleýmettik osal toptaryn jumyspen qamtý, olarǵa beriletin múmkindikterdi keńeıtý máselelerine erekshe nazar aýdaryldy.
Senat Tóraǵasy Ortalyq Azııa jáne TMD elderindegi áriptestermen barlyq salada, onyń ishinde zańnamalyq tájirıbe almasý baǵytynda yntymaqtastyqty nyǵaıtýdyń mańyzdy ekenin tilge tıek etti. Sondaı-aq ol osyndaı dástúrli dostyq qarym-qatynastar men ózara tıimdi baılanysty damytý elderimiz úshin negizgi basymdyqtardyń biri bolyp sanalatynyn aıtty.
«Sońǵy jyldary bizdiń elderimizdiń baılanysy kóptegen baǵyt boıynsha nátıjeli jáne serpindi damyp keledi. О́ńir memleketteriniń basshylary ekijaqty jáne kópjaqty formatta árdaıym kezdesip turady. Olar yntymaqtastyqty nyǵaıtýdyń ózekti máselelerin talqylap, óńirlik jáne halyqaralyq kún tártibiniń mańyzdy aspektileri boıynsha ustanymdardy kelisip otyrady. Parlamenttik baǵyt boıynsha da biz ózara is-qımyl men yntymaqtastyqty dáıekti túrde damytyp kelemiz. Bul forým Ortalyq Azııadaǵy áleýmettik kásipkerlerdiń tyǵyz qarym-qatynas ornatýyna jol ashatyn turaqty jáne tıimdi alań bolady dep úmittenemiz. Qazaqstan Parlamentiniń Senaty osy bastamaǵa qajetti qoldaý kórsetýge jáne óńirlik áleýmettik bastamalardy iske asyrýǵa yqpal etýge daıyn», dedi Máýlen Áshimbaev.
О́z kezeginde kezdesýge qatysýshylar Qazaqstannyń áleýmettik kásipkerlikti qoldaý salasyndaǵy tájirıbesine nazar aýdaryp, ony zerdeleýdiń mańyzdylyǵyn atap ótti. Aıta keteıik, Memleket basshysy Qasym-Jomart Toqaevtyń tapsyrmasy boıynsha 2021 jyly Áleýmettik kásipkerlik týraly zań ázirlenip, qabyldandy. Onda qyzmettiń quqyqtyq negizderi, áleýmettik kásipkerlikti memleket tarapynan qoldaý tetikteri aıqyndaldy.
Quryltaı barysynda aýyldyq jerlerde áleýmettik kásipkerlikti damytý jáne ony qarjylandyrý, tıisti jeliler men qaýymdastyqtar qurý jónindegi ıdeıalar da aıtyldy. Ekologııa jáne ornyqty damý salasyndaǵy jobalardy qolǵa alý, sondaı-aq, memlekettik organdarmen jáne bıznes-qoǵamdastyqpen áriptestik qatynastardy nyǵaıtý máseleleri de sóz boldy.
Eki kúnge jalǵasatyn Ortalyq Azııa áleýmettik kásipkerleriniń quryltaıynda áleýmettik kásipkerlik jáne qarjylyq modeldeý, bıznes-strategııalardy ázirleý, satý men marketıngti uıymdastyrý boıynsha sheberlik sabaqtary ótkiziledi. Uıymdastyrýshylar arasynda Emın Askerov, Áıgerim Janalınova, Merýert Júnisbek, Gúlmıra Parmysheva sııaqty áleýmettik kásipkerlik salasyndaǵy tanymal trenerler men koýchtar bar.
Sonymen qatar is-shara aıasynda «Impact_onim» áleýmettik kásipkerler ónimderiniń jármeńkesi jáne mamandandyrylǵan ekskýrsııa ótedi. Sonyń barysynda qatysýshylar «Green TAL» sheberhanasynyń, «Up and Go» damý ortalyǵynyń jáne «Zamandas 21» aýla klýbynyń qyzmetimen tanysady.