Densaýlyq saqtaý mınıstri Ajar Ǵınııat kezekti Úkimet otyrysynda elimizdegi qyzylsha aýrýy boıynsha ahýaldy aıtyp berdi, dep habarlaıdy Egemen.kz.
«Qyzylsha aýrýynyń asqynýy boıynsha álemniń 167 elinde 415 myńnan astam jaǵdaı tirkelgen. Elimizde qyzylshanyń 17 myńnan astam jaǵdaıy tirkeldi. Olardyń 82%-dan astamy balalarǵa tıesili, onyń kópshiligi vaksına almaǵan balalar.
Qyzylsha aýrýlary barlyq óńirlerde tirkeldi, joǵary deńgeı Shymkent pen Almaty qalalarynda, Jambyl, Almaty, Mańǵystaý, Aqtóbe, Qyzylorda jáne Atyraý oblystarynda baıqalady», deıdi mınıstr.
Búgingi tańda elimizde qyzylshamen aýyrǵan naýqastarǵa arnalǵan 3,5 myńnan astam tósek-oryn bar, 2375 bala stasıonarda em qabyldap jatyr. Búgingi tańda tósek oryn qamtý júktemesi 59,5 paıyzdy quraıdy, 1 myńnan astam oryn rezervte tur. Emdeýge jatqyzylǵandardyń ishinde 30 bala reanımasııa bólimshelerinde aýyr jaǵdaıda jatyr, 1 jasqa deıin – 15 bala bar.
«Qyzylsha boıynsha jaǵdaıdy turaqtandyrý maqsatynda 1 jastan 6 jasqa deıingi 600 myńnan astam bala josparly ımmýndaýmen qamtyldy, bul vaksınasııalanatyndardyń 84%-yn quraıdy. Jyl sońyna deıin osy jas tobyndaǵy 100 myńnan astam balany qamtý josparlanyp otyr. Sonymen qatar qyzylshaǵa qarsy vaksınanyń qosymsha 1,5 mln dozasy satyp alyndy. Búgingi tańda 500 myń doza kelip tústi, jeltoqsan aıynda 1 mln doza jetkiziledi dep kútiledi.
Jalpy, qosymsha ımmýndaýdyń tıimdiligi 2005, 2015 jáne 2019 jyldardaǵy qyzylshanyń aldyńǵy órshýi kezinde dáleldendi», dep baıandady Densaýlyq saqtaý mınıstri.