Kóktaıǵaq. Ákim júrse kópti oılap...

Aýa raıy kúrt ózgergen. Bul ýaqytta aıaz kúshine minbegenimen, siresip, syqyrlaǵan aq qar jatar edi. Qala da, dala da qurǵaq. Endi, mine, jaz boıy jaýmaǵan jaýyn eldiń berekesin alyp tur. Adam janyn túrshiktirer jol apatyna baılanysty kúrt oqı­ǵa kóbeıgen. Kólik túgili jaıaý adamǵa qarǵa adym jer muń bol­ǵan. Abaısyzda jol jıegine qu­lap, mertikkenderdiń sany kún saıyn kóbeıip keledi. Qaladaǵy kom­mýnaldyq kásiporyndar jaıaý júr­ginshiler jolyna, kólik kóp júre­tin burylystarǵa ınertti mate­rıaldar tókkenimen, mardymsyz.

– Ortalyq kóshelerge ǵana qum sebilip jatyr. Shetki kósheler nazardan tys qalyp jatyr. Kólik júretin, jaıaý júrginshilerdiń jo­ly da siresken kók muz, – deı­di qala turǵyny Tileýjan Túl­kibaev.

Keleńsiz jaıdy kóz kórip júr. Sońǵy táýlikterde oblys­tyq aýrýhananyń qabyldaý bólmesine baryp kómek suraǵan adamdardyń sany júzden asyp ketken. Alpystan asa adam túr­li jaraqat alypty. Ásirese egde adamdar men mektepke baratyn balalarǵa qıyn bolyp tur. О́zge­sin bylaı qoıǵanda, bilim oshaqtarynyń aldyndaǵy kóseniń ıegindeı jaltyraǵan kók muz qaýip tóndirip otyr.

Kúni keshe áldebir sharýanyń yńǵaıymen shetki kósheniń bi­rinde oqys oqıǵaǵa tap boldyq. Jol jıegimen táltirektep kele jatqan elýdiń ústindegi bir azamat shalqasynan tústi. Shaqpa tasqa qaraqusymen qulady. Kilt toqtaǵanymyzben, qys­qy doń­ǵalaqtyń ózi kók muzda taıǵanap, kóldeneńdeı toq­tadyq. Álgi pa­qyrǵa kómek­tessek degen nıetpen. Ile halyq jı­nalyp qaldy. Jedel járdem shaqyryp jatyr. Beınet aıaq as­tynda degen – osy. Eger ýaq­­ty­ly jol tazalanyp, taban as­­tyna ınertti materıaldar tó­selip, jaǵ­daı jasalsa, múge­­dek­ter sany kó­beımes edi.

Kópke deıin álgi kórinis kóz aldymnan ketpeı qoıǵany. Saqtansań saý qalatynyń belgili, áıtse de, halyqqa janashyrlyq jasap, saqtaý da kerek qoı.

Kókshetaý