«Shańyraq» respýblıkalyq baıqaýynyń jeńimpazdary anyqtaldy. Qazaqstan halqy Assambleıasynyń etnojýrnalıstıka salasyndaǵy shyǵarmashylyq konkýrsyna respýblıkalyq, oblystyq jáne etnostyq BAQ ókilderi qatysty. Júzden júırik shyqqandar arasynda áriptesimiz Gúlnar Joljan da bar.
Baıqaýdy Mádenıet jáne aqparat mınıstrligi men «Qoǵamdyq kelisim» RMM uıymdastyrǵan. Mundaǵy maqsat – daryndy jýrnalısterdi anyqtap, olardyń qoǵamdyq kelisim men birlikti nyǵaıtýǵa jáne etnojýrnalıstıka salasyn damytýǵa qosqan eleýli úlesteri úshin yntalandyrý.
Elordada Dostyq úıinde ótken marapattaý rásimine Qazaqstan halqy Assambleıasy tóraǵasynyń orynbasary – Prezıdent Ákimshiligi QHA Hatshylyǵynyń meńgerýshisi Marat Ázilhanov, Mádenıet jáne aqparat mınıstrligi Etnosaralyq qatynastardy damytý komıtetiniń tóraǵasy Ǵalym Shoıkın, «Qoǵamdyq kelisim» RMM dırektory Elına Masagýtova, Parlament depýtattary, jýrnalıster, respýblıkalyq jáne oblystyq BAQ ókilderi qatysty.
Baıqaý barysynda Qazaqstan halqy Assambleıasynyń qyzmetin, jobalaryn jarııalap, bedelin arttyratyn, qoǵamdyq kelisim men jalpyulttyq birlikti nyǵaıtýda memlekettik saıasatty keńinen nasıhattaıtyn jáne memlekettik tildiń qyzmet aıasyn keńeıtýge baǵyttalǵan úzdik avtorlar iriktelipti.
Bas júlde «Vechernıaıa Astana» respýblıkalyq qoǵamdyq-saıası gazetiniń tilshileri – Alına Imambaeva men Ekaterına Tyshenkoǵa, I oryn – «Life09» aqparat agenttigi bas redaktorynyń orynbasary Aısultan Jaqypov pen «Qazaq radıolary» JShS redaktor-júrgizýshisi Gúljamal Ametbakıeva jáne «Egemen Qazaqstan» respýblıkalyq gazetiniń aǵa tilshisi Gúlnar Joljanǵa, II oryn – «Prıkaspııskaıa kommýna» oblystyq qoǵamdyq-saıası gazetiniń tilshisi Anjela Lı men «Syr boıy» oblystyq gazetiniń jýrnalısi Erjan Qojasov jáne «Janýbıı Qozoǵıston» qoǵamdyq-saıası gazeti bas redaktorynyń orynbasary Avazhan Boranbaevqa, III oryn – Qyzylorda oblystyq qoǵamdyq damý basqarmasynyń «Qoǵamdyq kelisim» KMM Buqaralyq aqparat quraldary jumysy boıynsha sektorynyń bas sarapshysy Ásel Abzal men Soltústik Qazaqstan oblystyq Jýrnalıster klýbynyń tóraǵasy Valentına Korneva jáne «Ravlodarnews» aqparattyq portalynyń jýrnalısi Aqbota Seısenbaevaǵa buıyrdy. Jeńimpazdar arnaıy dıplom jáne aqshalaı syılyqtarmen marapattaldy.
Al yntalandyrý syılyǵymen «Nash Kostanaı» oblystyq gazetiniń tilshisi Zýlfııa Nabıeva, «Ognı Alataý» qoǵamdyq-saıası gazetiniń tilshisi Aıgúl Gabsattarova-Em, «Qazaq» gazetiniń tilshisi Indıra Birjansal, «MediaPRO.KZ» redaktory Alıona Ganovıcheva, Tengrinews.kz aqparattyq portalynyń aǵa tilshi-redaktory Áıgerim Fazyl marapattaldy.