«Sheberdiń ınesi de, soqqan kúımesi de altyn» degen. Qaı salada bolsyn óz isin jetik biletin mamannyń júzi ashyq, abyroı-bedeli bıik bolady. Mamandyqqa adaldyq týrasynda oı qozǵaǵanda adam janynyń arashasy bola bilgen aq jeleńdilerge artylǵan júktiń jeńil emes ekenin ańǵaramyz. Sebebi «medısına mamandaryna qatelesýge bolmaıdy» degen qaǵıda bar. Dáriger bolý degenniń ózi «adamǵa jaryq syılaý» degen tirkespen úılesetin sekildi. Salada túıgen-bilgenim kóp, boldym-toldym demeı, shyńdalýdan jalyqpaıtyn dárigerlerdiń biri – Darhan Sybanbaev.
Bala jastan dáriger bolýdy armandaǵan ol 1990 jyly Eńbekshiqazaq aýdany Sógeti aýylynan arman qala Almatyǵa jol tartady. Sol kez Almaty memlekettik medısına ınstıtýtynda qazaq toby ashylyp, jer-jerden bilimdi talapkerler aǵylyp jatqan shaq edi. Qazaq tobyna qabyldanǵan stýdentterdiń arasynda Darhan da bar edi. Medısına mamandyǵyna kim de bolsa adasyp kelmeıtini túsinikti ǵoı. Keshegi túlek – búgingi stýdent. Shetinen birinen-biri ótken alǵyr. Mundaı ortada eshkimniń toptan qalǵysy joq. Darhan da qarajaıaý emes, qatarlastary sekildi myqty maman bolyp qalyptasatynyna ishteı senimdi. Sondyqtan salanyń bilgiri bolý úshin jatpaı-turmaı bilim alýǵa tıis ekenin erte túsingen. Oqýdaǵy alǵashqy qadamyn sýbordınator mamandyǵynan bastaǵan ol joǵary kýrsqa ótkende hırýrgııaǵa qyzyǵýshylyq tanytqan. Darhan qolyna dıplom alǵan jyly osy ınstıtýttyń hırýrgııa kafedrasynyń ınternatýrasynda oqýyn jalǵastyrdy. Búginde ol – Almaty oblysy, Jambyl aýdany Qarǵaly aýylyndaǵy aýdandyq aýrýhananyń bas dárigeri. Medısına ǵylymdarynyń kandıdaty, dosent, densaýlyq saqtaý salasynyń úzdigi.
Aýdan turǵyndary Darhan Áripulyn bilim-biliginiń arqasynda eldiń qurmetine bólenip júrgen jan dep biledi. Aýdandyq aýrýhanaǵa basshylyq qyzmetke 2020 jyly kelgen. Karantın ýaqyty, qaýyrt shaq. Naýqas kóp. Abyroı bolǵanda aýrýhanada bilikti mamandar jetkilikti. Koronavırýs qysa bastaǵan tusta birligi jarasqan ujymnyń bir jaǵadan bas, bir jeńnen qol shyǵaryp atqarǵan isteri kóp. Indet órship turǵanda aýrýhanaǵa ókpeni jasandy jeldetý apparatynyń segizi jetkizilgen. Qajetti dári-dármek, qural-jabdyqtan tarshylyq kórmegen. Osyndaı qıyn-qystaý kezeńde aýrýhanadan hırýrgııa bólimin ashý ońaı sharýa emes. Aýyldyqtar Darhan Áripulynyń osy qadamyna dán rıza. Eńseli aýrýhanaǵa kórshiles Úmbetáli, Qasymbek, Sholaqqarǵaly aýyldarynyń turǵyndary da kelip, em-domyn alady. Olar da bas dárigerdi tanyp alǵan. Aýrýhana zamanaýı talaptarǵa saı jabdyqtalǵan. Terapııa, gınekologııa, hırýrgııa, perzenthana bólimderi ashylǵan. Munda úı-úıdi aralap júretin patrontajdy dárigerler de barshylyq. Olardyń da eńbegine el rıza.
Búginde aýyl turǵyndary dárigerge qaralý úshin qalaǵa baryp áýre bolmaıdy. Gýmanıtarlyq kómek retinde jyljymaly rentgen kóligi qarastyrylǵan. «Nurly jol» baǵdarlamasy arqyly jasaqtalǵan emdik laboratorııa da bar. Biraq ázirge iske qosylmapty. Kópti qynjyltatyny – ǵımarattyń tarlyǵy ǵana. О́ıtkeni aýrýhana 15 myń adamǵa shaqtalyp salynǵan. Keıingi jyldary halyq sany óskeni bar, kóship kelgeni bar emhanaǵa uzyn-sany 40 myń adam tirkelgen. Ásirese qys mezgilinde sapyrylysqan jurttyń emin-erkin júrip-turýy qıyn kórinedi. Ol azdaı bir kabınette 3-4 dárigerden otyrýǵa týra keledi. Aýyl turǵyndary jyl saıyn Úkimetke qosymsha ǵımarat kerek dep jar salǵanymen, ázirge ótinishke qulaq asar jan tabylmapty. Darhan Áripulynyń ózi de bir sózinde «Emhana janynan 350 adam qabyldaýǵa shaqtalǵan taǵy bir nysan salynsa eken» degen armany baryn aıtyp edi. Ár adam úshin densaýlyq – birinshi baılyq. Dárigerler sol baılyqty saqtaýǵa qoldan kelgenshe járdemdesedi, baryn, janyn salady. Sózimizdi túıindeı kele, naýqastardyń emine sebepshi bolyp júrgen joǵary sanatty hırýrg Darhan Áripuly sekildi bilgir maman kóp bolsyn demekpiz.
Jankeldi AMANKELDIULY
Almaty oblysy