Elimizde aldaǵy jyldary memleket-jekemenshik áriptestigi arqyly birsypyra jańa áleýmettik nysandar ashý josparlanyp otyr. Premer-mınıstr Álıhan Smaıylov Áleýmettik saladaǵy MJÁ-ni damytýdyń 2024-2028 jyldarǵa arnalǵan keshendi josparyn bekitý týraly qaýlyǵa qol qoıdy.
Atalǵan qujat Memleket basshysy Qasym-Jomart Toqaevtyń áleýmettik ınfraqurylymdy damytýǵa jeke ınvestısııalar tartý jónindegi tapsyrmasyn oryndaý maqsatynda qabyldandy. Keshendi josparda jobalardy smetalyq qunynyń 30%-y kóleminde memleket tarapynan qosa qarjylandyrý kózdelgen. Qalǵan 70%-yn jeke seriktes tartýy kerek.
Josparda joǵary bilim, densaýlyq saqtaý, halyqty áleýmettik qorǵaý, sport jáne bilim berý salalary boıynsha jalpy 43 nysan qamtylǵan. Qurylystan keıin jeke seriktester 10 jyl boıy tehnıkalyq qyzmet kórsetýdi basqaryp, qamtamasyz etedi. Al nysandar paıdalanýǵa berilgennen keıin memleket menshigine ótedi.
Máselen, 7,9 myń orynǵa arnalǵan stýdenttik 9 jataqhana salý josparlanyp otyr. Sonymen qatar Memleket basshysynyń Joldaýyn iske asyrý aıasynda jańa jataqhanalar ashylmaq. Atap aıtqanda, 2023 jyly 10,4 myń oryndyq 43 jataqhanany iske qosý josparlanǵan. Jalpy, barlyq qarjy kózderi esebinen 2028 jylǵa deıin 55,5 myń oryn paıdalanýǵa beriletin bolady.
Sonymen qatar jańa 3 emhana men 3 ońaltý ortalyǵyn ashý kózdelip otyr. Bul azamattardy medısınalyq jáne arnaýly áleýmettik qyzmettermen qamtýdy keńeıtýge múmkindik beredi.
Sport salasynda jańa 8 sport zalyn iske qosý josparlanǵan. Bilim berý júıesinde 5 oqý-saýyqtyrý ortalyǵyn, 5 oqýshylar saraıyn jáne 10 óner mektebin salý boıynsha jobalar iske asyrylady. Barlyq baǵyt boıynsha jańa obektilerdiń jalpy quny 261 mlrd teńgeden asady.