Halyqaralyq volonterler kúnine oraı oblystyq jastar-resýrstyq ortalyǵy, volonterlerdi qoldaý ortalyǵy front-ofısi jalǵyzilikti jandarǵa der kezinde kómek qolyn sozyp, qoldaý kórsetýge ázir turatyn volonterlermen kezdesý ótkizdi.
Jyly júzdesý barysynda volonterlerdiń jyl boıy atqarǵan jan jadyratar mazmundy jumystary ekshelip, qol jetkizgen tolaıym tabys ádil tarazy basyna tartyldy. Baıyptaı ańǵarsańyz, az dúnıe emes eken. 89 uıymda bastary qosylǵan 3600-ge jýyq jas toǵyz baǵyt boıynsha tyndyrymdy jumys atqarypty. Jyl boıy 1282 is-shara ótkizilgen. Olardyń árqaısysy adamgershiliktiń asyl qasıetterin boıyna sińirip, jelkildep ósip kele jatqan jastardyń aq nıetin, adal peıilin aıǵaqtaıtyn ádemi mysaldar. Qoǵamnyń osylaısha izgilenýi, nurlanýy qandaı jarasymdy. El bolashaǵyn oılaıtyn jas tolqynnyń aýyz birligi, kózqarastarynyń izgilikti arnada toqaılasýy, jańa bir serpinmen damýy úmit shyraǵyn laýlatyp tur. Aıtpaqshy, volonterlerdiń bastamasymen ótken jyl ishinde muqtaj jandarǵa 21 mıllıon 120 myń teńge qarajat jınalǵan.
Volonterler el ishindegi áleýmettik jaǵynan az qamtylǵan 807 otbasyǵa azyq-túlik aparyp berip, dastarqandaryn dámge toltyrǵan. Munan ózge de qamqorlyqtyń ǵajaıyp úlgisi talaıdy tánti etti.
Kezdesý barysynda jyl ishinde atqarǵan eseli eńbekteri úshin eriktiler oblys ákimi M.Ahmetjanovtyń, ulttyq volonterlik jeli zańdy tulǵalar birlestiginiń atqarýshy dırektory T.Mıronıýktiń jáne oblystyq ishki saıasat basqarmasynyń basshysy A.Alınniń aqjarma tilekteri jazylǵan Alǵys hattarymen marapattaldy. Jyl nátıjesin qorytyndylaıtyn baıqaý ótkizilip, jomart jandy jastardyń esimderi belgili boldy. Osy bir tolqynnyń ónegeli isteri zamandastaryna úlgi bolyp, keń qanat jaısa, kelisti bolmaq.
KО́KShETAÝ