Meńdiqara aýdanynda qurǵaq saýmal óndiretin tehnıkalyq ferma iske qosyldy. «S-Agro-Borovskoe» jaýapkershiligi shekteýli seriktestigi aldaǵy ýaqytta saýyn bıelerdiń sanyn myńǵa jetkizip, jyldyq ónim kólemin 40 tonnaǵa deıin arttyrýdy kózdep otyr.
Seriktestik basshysynyń aıtýynsha, qurǵaq saýmaldyń quramynda adam densaýlyǵyna paıdaly mıkroelementter men dárýmender kóp bolady. Jańa ónim sapasy jaǵynan tabıǵı saýmalǵa uqsaıdy.
«Aldaǵy ýaqytta nemistiń «Zollmann Stutenmilch GmbH» kompanııasymen birlesip, kosmetologııa, balalar men sportshylarǵa arnalǵan taǵamdardy shyǵaramyz. Qazir menshigimizde 15 myń gektardan asa jaıylym, 1 myńnan asa kóshim jylqysynyń tuqymy bar. О́ndiristi jolǵa qoıýdyń bastapqy kezeńinde óndiristik sehty, ákimshilik ǵımaratty paıdalanýǵa berý iske asyryldy. Salqyndatqysh tankter, pasterızator, 100 lıtrlik sýblımator, saýý júıesi iske qosyldy. Bolashaqta ónimdi óndirý qýatyn jylyna 40 tonnaǵa deıin arttyrýdy, 150 jumys ornyn qurýdy josparlap otyrmyz. Jobanyń jalpy quny – 10 mlrd teńge. Munyń syrtynda 400 bas iri qaraǵa arnalǵan sút fermasyn ashýdy josparlap otyrmyz. Munda jylyna 4 mln 500 myń lıtr sút óndiremiz», deıdi «S-Agro-Borovskoe» JShS dırektory Meıram Ahmetjanov.
Seriktestik qolǵa alyp otyrǵan biregeı joba nemis tehnologııasyna negizdelgen. Nemis kásipkerleri Gans Solman men Rýdolf Shtorh osydan 48 jyl buryn qymyz óndirisin jolǵa qoıyp, ózi oılap tapqan qymyz daıyndaý ádisin patenttep alǵan eken.
M.Ahmetjanovtyń aıtýynsha, ótken ǵasyrdyń 60-jyldary Batys Eýropa ǵalymdary qymyzdyń adam aǵzasyna paıdasyn jappaı zertteı bastaǵan. Bul zertteýlerdiń nátıjesinde bıe sútiniń ókpe, asqazan aýrýlaryn emdeýge, ımmýnıtetti kóterýge oń áser etetini anyqtalǵan. Solmandar áýleti osy tujyrymdardy ári qaraı damytyp, bıe sútiniń allergııasy bar balalarǵa asa paıdaly ekenin dáleldep shyqqan.
Qostanaı oblysy