Búginde Almaty qalasynda 30-dan asa volonterlik uıym jumys isteıdi. Olardyń quramynda 5 myńnan asa erikti bar. Qalanyń qoǵamdyq ómiri – osy eriktiler tobynyń únemi nazarynda. Olar kúndelikti bolyp jatqan qala tirligine beıjaı qaraı almaıdy. Ásirese qoǵamnyń áleýmettik muqtaj ókilderine árdaıym kómekke daıyn.
Jyl basynan beri volonterler 600-den asa is-sharanyń, aksııanyń ótýine muryndyq bolǵan. Eriktiler osy merizmge deıin 60 myń tonnaǵa jýyq gýmanıtarlyq kómek jınap, 200-den astam qan donoryn tartyp, myńnan astam otbasyna qajetti azyq-túlik qoryn jetkizgen. Almaty qalasy volonterler front-ofısiniń jetekshisi Baǵdat Anarbaevanyń aıtýynsha, eriktiler qıyn jaǵdaıda qalǵan adamdarǵa jáne az qamtylǵandar otbasylarǵa qamqorlyq jasap, qorshaǵan ortany qorǵaýda, muqtajdarǵa kómek kórsetýde únemi aldyńǵy shepte keledi.
Eriktiler ata-anasynyń qamqorlyǵynan aıyrylǵan balalardy oqytý, jalǵyzbasty zeınetkerlerge arnalǵan pansıonattarda shyǵarmashylyq keshter uıymdastyrý isinde belsendi bolsa, endi biri jan-janýarlarǵa nemese qorshaǵan ortanyń tazalyǵyn saqtaýǵa atsalysyp júr.
Eriktiler qala turǵyndaryna únemi qýanysh syılaýǵa ázir. Olar qalanyń barlyq aýdanynda elimizde túsirilgen fılmderdiń tegin kórsetilimderin ótkizýdi dástúrge aınaldyrǵan. Bul turǵyndarǵa qyzyqty demalys syılap qana qoımaı, kınoındýstrııa jańalyqtarynan habardar bolyp otyrýǵa yqpal etedi. Al barlyq aýdanda jumys isteıtin tilder saıabaǵynda qalalyqtar úshin qazaq tilimen qatar shet tilderin de tegin úırenýge qolaıly jaǵdaı qarastyrylǵan. Tilder saıabaǵyna kelýshiler eriktilerdiń ár qadamyna únemi rızashylyǵyn bildirip otyrady.
О́tken jyly eriktiler elmen birge bar qıynshylyqty eńsere otyryp, Túrkııanyń zardap shekken turǵyndaryna – 51,5 tonna, Sırııaǵa 3 tonnadan astam gýmanıtarlyq kómek jáne Abaı oblysynyń turǵyndaryna 5 tonna kómek jınaǵan. Qandaı qıyndyqta da birge bolyp, muqtaj jandardyń júregine úmit pen jubanysh, aınalaǵa qýanysh pen meıirim syılaýdy maqsat etedi.
ALMATY