Premer-mınıstr Álıhan Smaıylovtyń tóraǵalyǵymen Sıfrlandyrý máseleleri jónindegi komıssııanyń kezekti otyrysy ótti. Jıynǵa qatysýshylar Memleket basshysynyń tapsyrmasyn oryndaý maqsatynda ázirlengen Jyljymaıtyn múliktiń biryńǵaı memlekettik kadastryna (JBMK) qatysty máselelerdi talqylady, dep habarlaıdy Egemen.kz Úkimettiń baspasóz qyzmetine silteme jasap.
Bos jer telimderin jedel ári ashyq túrde bólýdi, sondaı-aq respýblıkanyń jer qory týraly aqparatqa azamattardyń tolyq qol jetkizýin qamtamasyz etýge arnalǵan. Jańa tásilge sáıkes, tańdaý, ótinim berý men tirkeýden bastap jer telimderin berýdiń búkil prosesi elektrondy formatqa kóshirildi. Barlyq bıznes-prosester tolyǵymen qaıta qaraldy. Qajetti qadamdar sany birneshe esege azaıtyldy, memlekettik qyzmet kórsetý merzimi shamamen 1 jyldan 30 kúnge deıin qysqardy.
Jalpy, 1 shilde men 28 qarasha aralyǵynda JBMK arqyly 1 mln-nan astam qyzmet kórsetildi, onyń ishinde 238 myń kadastrlyq tólqujat berildi. 25 mln-nan astam anyqtama men málimet qyzmet alýshylardan ótinish bermeı-aq alyndy. Taldaý nátıjesinde ákimdikter júktegen sıfrlyq derekterdiń barlyǵy talapqa saı emes ekeni anyqtaldy. Atap aıtqanda, qoldanystaǵy bas josparlar men egjeı-tegjeıli josparlaý jobalaryna (EJJ) túzetý engizý qajet. Sonymen qatar platformada ótinimderdi ýaqtyly qaramaý jáne negizsiz bas tartý faktileri anyqtaldy.
Á.Smaıylov kelesi jyldan bastap memlekettik qyzmetterdi tek sıfrlyq formatta sapaly túrde kórsetý úshin barlyq kemshilikterdi qysqa merzimde joıýdy mindettedi.
«Sıfrlandyrýdyń ózi dál osy sybaılas jemqorlyqty azaıtýǵa jáne qate derekter kólemin qysqartýǵa, sáıkes kelmeıtin koordınattar boıynsha jer telimderin berý faktilerin joıýǵa baǵyttalǵan. Bul máselelerdiń barlyǵy sıfrlandyrý nátıjesinde sheshilýi tıis. Biz ár óńirdegi jaǵdaıdy jan-jaqty qaraımyz. Eger jańa jyldan bastap adamdarǵa ruqsat berý turyp qalatyn bolsa, óńirlerdegi tıisti jaýapty tulǵalardy jumystan bosatýǵa deıin jaýapqa tartamyz. Biz atalǵan memlekettik qyzmetti ashyq qylyp, sıfrlandyrǵymyz keledi, al bas josparlar men EJJ qazirgi málimetterge sáıkes kelmeıdi. Sondyqtan kóp jaǵdaıda avtomatty túrde ruqsat berilmeı jatady. Biraq biz keri sheginbeıtinimizdi erekshe atap ótkim keledi. Báribir alǵa júremiz. Bul prosesti tejeıtinderdi jumystan shyǵaramyz. Olardyń ornyna óz qyzmetin laıyqty atqarýǵa bel býǵan adamdardy qoıý kerek», dedi Premer-mınıstr.