«Aýyl saǵynyshy» deıtin keremet án bar. «Uqsaısyń menimenen bir týǵanǵa, Uqsaıdy minez-qulqyń, tur-tulǵań da, Anamnyń saýsaǵynyń taby túsken, Aǵataı, janqaltańda qurtyń bar ma?...» dep bastalyp sońy: «Saǵyndym saharanyń qyr kóktemin, Saǵyndym Sarǵusynnyń jel ótterin, Saǵyndym sary kúzde qońyraýlatyp, Qaıtatyn aqqý-qazdyń tizbekterin» degen asa muńly, názik áýenmen aıaqtalady.
Joǵarydaǵy ánniń sózin jazǵan – Járken Bódeshuly. Jalpy, bul aqyn aǵamyzdyń tula boıy saǵynysh, sonyń ishinde týǵan jerin, balalyq bal kúni ótken mekenin sanaly ǵumyrynda júregine arqalap, sanasyna shegelep ótken shaıyr. «Týǵan jerdiń qar-muzy, Aıazyńmen jýyndyr, Týǵan jerdiń bal qyzy, Burymyńmen býyndyr, Týǵan jerdiń bulaǵy, Tolqynyńmen at meni, Týǵan jerdiń jylany, Shyryldatyp shaq meni...» deıdi Járken jyraý. Qandaı teńeý, qandaı shynaıylyq.
Al joǵarydaǵy «Aýyl saǵynyshy» ánine keler bolsaq, bul kezdeısoq burq ete qalǵan júrek ámiri tárizdi. Jyrdyń jazylý tarıhyna qatysty avtordyń óz aýzynan estigen Saǵı Musauly degen azamattyń aıtýyna qaraǵanda, 1990 jyldary Taldyqorǵan óńirinen Sháken degen kisi Ile Qazaq Avtonomııaly Raıonynyń Tarbaǵataı aımaǵyna týysshylap barady. Osy saparynda atajurttan kelgen jolaýshy Toly aýdanynyń turǵyny Ǵızat Seıitqazyuly degen kúıshimen tanysady. Ǵızekeń azǵana kún dámdes bolǵan Shákendi shekara shebine deıin jetkizip salyp turyp, aýzyn uqyptap tikken judyryqtaı túıinshek ustatady. «Myna sálemdemeni Járken Bódeshke tabys et!».
Sálemdeme aman-esen ıesine jetedi. Ashyp kórse, bir býma arsha men bir ýys qurt. Eń bastysy týǵan jerdiń ısi ańqyp tur. Kóńili tolqıdy, kózde jas... Sóıtip, apaq-sapaqta Járkenniń kókeıine qazirgi keremet jyrdyń sulbasy uıalaıdy. Eki kúnnen keıin kókeıge sulbalanǵan jyr qaǵazǵa túsedi. Arada bir-eki jyl ótkende Járken bul óleńdi teleekranǵa alyp shyǵady. Kúrkirep oqıdy, el dúrkirep qol soǵady...
Dál osy sátti shekaranyń arǵy jaǵynda qazaq teledıdaryn buldyr-saldyr kórip otyrǵan joǵarydaǵy Ǵızat kúıshi Járken oqyǵan mátindi dıktofonǵa jazyp ala qoıady. Erteńinde sazger bolýǵa talaptanyp júrgen balasy Dýmanǵa tyńdatady. Sergek jigit birden: «Áke, mynaý ánge suranyp turǵan mátin ǵoı», dep iske kirisedi. Sóıtip, qazirgi tańda kópshilik súıip tyńdaıtyn «Aýyl saǵynyshy» áni dúnıege keledi.
«Araǵa talaı jyl salyp Járken Bódeshuly týǵan jeri Tolyǵa keldi. Jerlesteri aqyndy «Aýyl saǵynyshy» ánimen qarsy aldy. Zamandasy kúıshi Ǵızat saǵynysh jyrshysy Járkenge arnap «Sarqasqanyń saryny» atty kúı shyǵaryp, kezdesý kezinde oryndady. Saǵynysh jyryna keremet án shyǵarǵan Dýman Ǵızatulyna aqyn aǵasy Járken rızashylyǵyn bildirip, alǵys-batasyn jaýdyrady» dep jazypty ShUAR Buratola avtonomııalyq Mońǵol oblysy Jyń aýdanynyń turǵyny, ádebıetshi-ustaz Saǵıdolda Musaqynuly atty qandasymyz.