2040 jyly elimizde sý tapshylyǵy 15 mıllıard tekshe metrdi quraıdy. Bul shamamen Aral teńizine parapar sý. Iаǵnı, taza aýyz sý retinde paıdalanylatyn sýdyń kólemi kemi 50 paıyzǵa azaıady. Bul – árbir ekinshi otandasymyz aýyz sýsyz qalady degen sóz. Al, aýyz sýsyz adam úsh kún ǵana ómir súretini málim, sondyqtan óte qaýipti. Demek, dabyl qaǵar ýaqyt jetti. Osylaı degen birmandatty okrýg boıynsha saılanǵan Májilis depýtaty Baqytjan Bazarbek sý resýrstaryn basqarý máseleleri boıynsha Premer-mınıstrge depýtattyq saýal joldady, dep habarlaıdy Egemen.kz.
Memleket basshysynyń sý tapshylyǵy máselesin der kezinde kóterip, arnaıy 20 jańa bógen salý, 3 myń 500 shaqyrymdyq kanaldy jańǵyrtýdy tapsyrǵanyn atap aıtqan depýtat resmı derekterdi keltirdi: elimizde 1 478 gıdrotehnıkalyq qurylǵy bar. 342 sý qoımasy, 219 damby, 119 sý toraby, 313 toǵan bar. Olardyń 333-i respýblıkalyq menshikte, 895-i kommýnaldyq menshikte. Al 228-i jekemenshikte. Iesiz qalǵan 22 sý qoımasy bar.
«Sý qoımalary eń basty strategııalyq nysan ekenin bilýimiz kerek, onyń kóbi jekeshelendirilip ketkendikten qatty alańdatady. Qojaıyndary ne istep, ne qoıyp jatqany belgisiz. Jekemenshik bolǵannan keıin memlekettik baqylaýdan tys qalǵan», dedi depýtat.
B.Bazarbektiń sózinshe jalpy sý nysandaryna tolyq túgendeý jumysyn jasap, jaıyn naqtylaý, qajet bolsa olardy tez arada memleket menshigine qaıtarý kezek kúttirmeıtin is. Mysaly Platınalardyń salynǵanyna 30-40 jyldan assa, apat bolý qaýpi artady eken. Qanshasy tozyǵy jetken, qanshasyna jóndeý jumystary qajet degen málimetter anyq emes. Bul memlekettik jaýapty mekeme tarapynan baqylaý men monıtorıngtiń álsizdigin kórsetedi.
«Kelesi bir mańyzdy nysan bul – kanaldar. Málimetter boıynsha, 3 myń 500-deı magıstraldik jáne sharýashylyq kanaldar bar, olardyń jartysynan astamy tozyǵy jetken, saldarynan 60 paıyz sý qurdymǵa ketip jatyr. Bul úlken shyǵyn, demek bar sýdy ysyrap etip durys paıdalana almaı otyrmyz», dedi B. Bazarbek.
Májilismen kanaldardyń birazy jekemenshikke ótip ketkenin, kimniń ıeliginde ekeni de anyq emes ekenin aıtty. Sondaı-aq depýtat Prezıdenttiń kanaldarǵa qatysty bergen tapsyrmasy óte oryndy ekenin atap ótti.
«Máseleniń mańyzdylyǵyn eskere otyryp, «Amanat» partııasy janynan arnaıy komıssııa qurý qajet dep esepteımin. Atalǵan partııanyń jaıylymdyq jerlerdi memleket menshigine qaıtarý jóninde qylǵan tabandy is-áreketi kópke belgili, sol tájirıbeni kanaldarǵa jáne sý qoımalaryna qatysty da qoldanýǵa ábden bolady. Áriptesterimdi osy usynysty qoldaýǵa shaqyramyn», dedi ol.
«Elimizde jekemenshikke ótip, biraq qaraýsyz qalǵan, jumystary úılestirilmegen sý qoımalaryn, dambylardy, kólderdi, bógenderdi memleketke qaıtarý sharalaryn qolǵa alý kerek jáne dereý tekserý jumystaryn júrgizý qajet. Árıne, sonymen qosa, sý resýrstaryn utymdy paıdalaný mańyzdy. Sýdyń da suraýy bar dep halqymyz beker aıtpaǵan, sol sebepti sý salasynda zańsyzdyqqa jol berip, talapqa baǵynbaıtyndar qatań jazaǵa tartylýy tıis dep esepteımin», dep túıindedi depýtat B.Bazarbek.