El Úkimeti sharýalardy qoldaý boıynsha qajetti sharalardy qabyldaýda. Otandyq agrarıılerden 4 jáne 5-klasty jáne klassyz bıdaı satyp alý úshin Úkimet rezervinen qarajat bólindi. Tıisti qaýlyǵa Premer-mınıstr Álıhan Smaıylov qol qoıdy.
Qujat Memleket basshysynyń bıyl qolaısyz aýa raıynan zardap shekken aýyl sharýashylyǵy taýar óndirýshilerin qoldaý boıynsha jedel sharalardy qamtamasyz etý jónindegi tapsyrmasyn oryndaý sheńberinde qabyldandy.
Atap aıtqanda, qarajat Azyq-túlik korporasııasynyń otandyq agrarıılerden 350 myń tonna 4 jáne 5-klasty jáne klassyz bıdaıdy tikeleı satyp alý úshin bólinip otyr. Qarajat kólemi 31 mlrd 375 mln teńgeni quraıdy.
Búginde dándi daqyldardy jınaý jumystary aıaqtalyp, 16,9 mln ga alqaptan dándi jáne burshaq daqyldary jınaldy. 9,8 s/ga ortasha ónimdilikte 16,6 mln tonna bıdaı, onyń ishinde ortasha ónimdiligi 8,6 s/ga 11,5 mln tonnaǵa jýyq astyq bastyryldy.
Sonymen qatar egin oraǵy kezinde úzdiksiz jaýǵan jaýyn-shashyn jumystyń qarqyny men ónim sapasyna áser etip, sharýalar qıyn jaǵdaıǵa tap boldy. Oryn alǵan jaǵdaı aýyl turǵyndarynyń jınalǵan ónimdi ótkizýine, sáıkesinshe, kelisimsharttar boıynsha mindettemelerin oryndaýǵa keri áserin tıgizdi.
Qazirgi ýaqytta ótken jyldan qalǵan kólem men ishki tutynýdy eskere otyryp, jınalǵan ónim otandyq naryqty qamtamasyz etýge jáne belgili bir kólemde eksportqa, onyń ishinde un túrinde jóneltýge jetkilikti.
Eske salaıyq, jalpy 2023 jyly Úkimet AО́K-ti sýbsıdııalaýǵa barlyq kózden 494 mlrd teńge, onyń ishinde Úkimet rezervinen ósimdik jáne mal sharýashylyǵyn sýbsıdııalaýǵa qosymsha 60 mlrd teńge bóldi.
Sondaı-aq «Aýyl amanaty» baǵdarlamasyn júzege asyrýǵa respýblıkalyq bıýdjetten 100 mlrd teńge baǵyttaldy.