Elimizdiń barlyq óńirinde qys qysyp, aıaz kúshine minip tur. Saqyldaǵan aıaz tek adamdardyń shıraq qımyldaýyna ǵana emes, kólikterdiń de ońaı otalýyna kóp kedergi. Qys mezgili jetkende jer-jerden avtokólikterdiń órtke oranǵanyn kórip, estip jatamyz. Máselen, Arqanyń aıazy arqaǵa batqan jeltoqsannyń alǵashqy eki aptasynda Astanada 11 kólik órtenip ketken. Qaqaǵan qysta kólikterdiń janyp ketýi eń aldymen avtomashına qurylǵylarynyń mezgilge saı baptalmaǵanyn bolady.
Turaqta turalap qalmaý úshin kólik ıesi qara kúzden bastap qamdaný qajet. Kólik ekspertteri qysta kóliktiń qyzbaı, jolda júıitkip ketpeýiniń basty sebepterine akkýmýlıatordyń otyryp, motor maıynyń qatyp qalýy sebep deıdi.
Eger kóligińiz jyly avtoturaqta turmasa akkýmýlıatordy «aıalap» ustaý kerek.
Qatty aıazda akkýmýlıatordyń qýaty azaıyp ketedi. Sol úshin ony kıizben ne sýyqtan qorǵaıtyn arnaıy japqyshpen oraǵan durys nemese jyly orynǵa ákelip qoıý kerek. Kólik ıeleri aıaz báribir degenin isteıdi dep, kóligin kez kelgen jerge jaıǵap jatady. Bul da qate pikir. Tańda sýyqpen talasyp sergeldeńge túspes úshin, mashınańyzdy jel tımeıtin yq jerge ornalastyryńyz. Eger avtootaldyrǵysh (avtozavodka) ornatylǵan bolsa, mindetti túrde «temperatýraǵa saı avtomatty otalý» qyzmetin qosyńyz. Sonda motor sýyǵan kezde kólik ózdiginen qosylyp, qatyp qalýdyń aldyn alady. Bul jaǵdaıda kólik ıesi avtoqurylǵydaǵy elektrli symdardyń durys jalǵanǵanyna 100 paıyz kóz jetkizý kerek.Kólikti qysta qıyndyqsyz otaldyrýdyń myna tásilderin usynamyz:
Birinshi kezekte kólikti jylytý qajet. Akkýmýlıatorda bári qalypty ekenin bilseńiz, másele maıda bolýy múmkin. Bizdiń elde jıi qoldanystaǵy qysqy maı – 40 gradýsqa tózimdi dep satylǵanmen, praktıkada bul dál kelmeı jatady. Sondyqtan mashınany jyly orynǵa súırep nemese ornynda ystyq jel úrleıtin qurylǵyny (teplopýshka) qoldanyńyz. Motordy arnaıy qyzdyrǵysh qural arqyly astyńǵy maı turatyn túbiniń tusynan qyzdyrý kerek nemese arnaıy qondyrǵymen ystyq jel jibergen jón. Ol kezde kóliktiń aldyńǵy bóligin (kapot) aınaldyra qymtap, ystyqty sol orynda ustap qalýǵa tyrysyńyz. Bul ádis boıynsha kólik 15-20 mınýttan keıin jylynady. Arnaıy qyzdyrǵyshty qoldanarda ystyq jeldi aldyńǵy aına, terezelerine baǵyttaýdan saq bolyńyz. Aıazda qatyp turǵan terezeler tosyn jyly lepten shytynap ketýi yqtımal. Motor maıyn ysytyp quıý arqyly otaldyrý kerek.
Aıazda maıy qatyp qalǵan kólikti qosymsha kúshsiz otaldyrý úshin:
Ár kúni kelesi rette kólikke minbeıtin bolsańyz mashınanyń akkýmýlıatoryn sheship alyp peshtiń ne úıdegi jylý batereıasynyń qasyna qoıý kerek; Motor maıyna da osy ádisti qoldanyńyz. Motor maıynyń markasy men standarttyq nómiriniń kóligińizge quıyp júrgenmen birdeı bolǵany durys. Maıdy ashyq, ot laýlap janatyn peshtiń qasyna qoıýdan saqtanyńyz. Túni boıy jylynǵan akkýmýlıatordy ornyna salyp, ysyǵan maıdy motorǵa quıý qajet. Bul prosessten keıin kólikti lezde otaldyrýǵa asyqpańyz. Akkýmýlıator men motor maıy fızıkalyq áreketke kóshýge daıyn bolatyn 3-5 mınýt aralyǵynda kiltti buraǵanyńyz durys.Sondaı-aq joǵaryda aıtylǵan keńester kádege jaramasa avtoservısterge júginý durys sheshim. Belgili mekenjaıǵa jetý úshin arnaıy evakýatordyń kómegine júgingenińiz qashanda qaýipsiz.
Júrgizýshiler kóligi otalmasa jıi júginetin kelesi tásil basqa mashınanyń akkýmýlıatory arqyly qurylǵyny qýattaý. Bul da ońaı tásil bolǵanmen eki qurylǵyny jalǵaıtyn basynda qysqyshy bar kabeldiń sapaly ekenine nazar aýdaryńyz.
«Jol amandyǵy, er amandyǵy» degen támsil bar. Kóligińiz qysqa saqadaı saı bolmasa alys jolǵa josparyńyzdy jyly kúnderge shegerińiz. Akkýmýlıatorǵa bappen qarap, motor maıyn alarda sapalysynan qarjy qaǵyp qalmańyz!