Qazaqstan ózge elden úırenetin emes, úıretýshi memleketke aınalǵanda ǵana irgesi bekı túsedi. Tutynýshy elden góri óndirýshi memleket bolǵanda ǵana áleýetimiz arta túspek. Prezıdent Qasym-Jomart Toqaev Astanada ótken «Altyn sapa» jáne «Paryz» syılyǵynyń ıegerlerin marapattaý rásiminde osyǵan nazar aýdarý qajettigin basa aıtty, dep habarlaıdy Egemen.kz Aqordaǵa súıenip.
«Biz úırenetin ǵana emes, úıretetin ult bolýymyz kerek. Tutynatyn emes, óndiretin memleket bolýymyz qajet. Men bul týraly únemi aıtyp júrmin. «Qazaqstanda jasalǵan» degen tańba eń myqty sapanyń, eń jaqsy ónimniń belgisine aınalýǵa tıis. «Altyn sapa» baıqaýynyń basty maqsaty – osy. Sonymen birge, bıznes ókilderi halyq aldyndaǵy jaýapkershilikti tereń sezinýi kerek. Adal azamat óz jaǵdaıyn ǵana jasamaıdy. Ol týǵan aýylynyń nemese ózi jumys istep jatqan aımaqtyń qamyn da oılaıdy. Mundaı kásipkerler kópshiliktiń qoldaýyna jáne alǵysyna ıe bolady. Shyn máninde, týǵan eldiń yqylasynan artyq marapat joq. «Paryz» baıqaýyna qatysýshylar bıyl túrli áleýmettik jobaǵa belsene atsalysty. Qaıyrymdylyqqa 80 mıllıard teńgege jýyq qarjy jumsady. 6 myńnan astam jańa jumys ornyn ashty», degen Q.Toqaev tabysyn kóppen bólisip, qaıyrymdylyqqa jumsaǵan atymtaı-jomart azamattar qashanda joǵary qurmetke laıyq ekenin aıtty.