Qylyshyn súıretip qys jetkende kún raıynyń qandaı bolaryn boljap bilý múmkin emes. Aýa temperatýrasy aıazdy bolyp, qys qysqanda úlkenderdiń ózi syrtqa shyǵýǵa taısaqtap turady. Sol sebepti qysy qatty óńirlerde sabaqtar jıi toqtatylyp jatady. Mektep oqýshylary men kolledj stýdentteri qansha gradýs aıazda oqý ornyna barmasa bolady? Búgin mektepke, kolledjge barýdyń qajeti bar ma, joq pa dep kún saıyn kóńilinde kúdik uıalaıtyndar úshin saýaldyń resmı rettelgen tártiptik júıesine túsinik beremiz.
Sabaq toqtatylǵanyn kim habarlaıdy?
Aldymen qolaısyz aýa raıynda sabaqty toqtatý týraly aqparatty ár óńirdiń bilim basqarmasyna qarasty memlekettik organdar habarlaý kerek.
Mudaı málimetter:
Telearnalardyń júgirtpe jolynda; Radıo habarlarynda; 169 (aqyly anyqtama) nemese 109 (uıaly telefonnan tegin) nomerinen telefony arqyly; Ákimdiktiń resmı saıttarynda; Astana qalasynda e_astana.kz elektrondy qyzmet portalynda; Bilim.astana.kz saıtynda; Smart Astana qoldanbaly baǵdarlamasy men jan-jaqty derekkózder arqyly habarlanyp otyrady.Ata-ana, oqýshy, kolledj stýdentteri osy aqparat arnalarynda jarııalanǵan derek negizinde áreket etý kerek.
Kún saıyn, birinshi aýysym úshin saǵat 6.45-ten 7.00-ge deıin, ekinshi jáne úshinshi aýysymdar úshin saǵat 11:15-ten 13:00-den keshiktirilmeı sabaqtyń kestege saı bolatyny ne qashyqtan oqytylatyny týraly málimet jarııalanýy kerek.
Qysta aýa temperatýrasy qansha gradýsqa jetkende sabaq toqtatylady?
Mektep pen kolledjde sabaqtar myna meteojaǵdaıdaǵy kórsetkishter negizinde toqtatylady:
Aýa temperatýrasy
Jeldiń jyldamdyǵy
Sabaqtardy toqtatý úshin
-25-29 jáne odan tómen
2-4 m/s
0-4 synyp
-25-29 jáne odan tómen
5 m/s jáne odan joǵary
0-9 synyp
-30-34 jáne odan tómen
2-4 m/s
0-9 synyp
-30-34 jáne odan tómen
5 m/s jáne odan joǵary
0-11 (12) synyptar
Kolledjderde 1,2 kýrstar úshin
-35 jáne odan tómen
2 m/s jáne odan joǵary
0-11 (12) synyptar
Kolledjderde 1,2 kýrstar úshin
Al ınternattyq bilim berý uıymdarynda aýa raıynyń qolaısyz meteojaǵdaılary kezinde sabaqty toqtatý týraly sheshim bilim alýshylardyń turǵylyqty ornyndaǵy aýa temperatýrasy eskerilip qabyldanady.
Sabaq toqtatylǵan kúngi josparly taqyryptar qaıta ótkizile me?
Aıazdy kúnder aptaǵa sozylyp ketse sabaq jospary buzylary sózsiz. Sondyqtan bilim berý uıymdary eger sabaq 5 kúnnen artyq toqtatylsa, onda oqý pánderiniń mazmunynyń ıntegrasııalanýyn, rezervtik saǵattar jáne qaıtalaýǵa bólingen saǵattardy eskere otyryp quryltaıshynyń kelisimi boıynsha bilim berý uıymynyń jyldyq kúntizbelik-taqyryptyq josparyna túzetýler engizý qajet.
Eger bala, stýdent sabaq toqtatylǵan kúni bilim ordasyna barsa keri qaıtaryla ma?
Joq. Eger oqýshy, stýdent sabaqty qashyqtan oqytý belgilense de mektep, kolledjge kelse sabaqty sol jerde oqý kerek. Baqylaý jumysy men jańa taqyryptan bólek qosymsha sabaq, úıirme taǵy basqasy júrgizilýge tıis.
Al qashyqtan oqytylǵan kúndegi baǵalaý obektıvti bolý úshin sabaq kestesine sáıkes barlyq jýrnaldardyń túrlerinde kúni qoıylady, al «Sabaqtyń taqyryby» baǵanynda «aktilengen kún» dep jazylady. Sabaqtar toqtatylǵan kúni oryndalǵan jumys úshin bilim alýshyǵa baǵa túzetý engizilgen kúntizbelik-taqyryptyq josparǵa sáıkes kelesi oqý sabaqtary kúnderinde jýrnaldyń baǵanyna qoıylady.
Ata-analar (zańdy ókilder) balasy sabaq toqtatylǵan kúni bilim berý uıymyna baratyny týraly sheshim qabyldaǵan jaǵdaıda onyń bilim berý uıymyna kelýi jáne keri qaraı jolyndaǵy qaýipsizdigin qamtamasyz etý jaýapkershiligi ózderine júkteledi.