Izgi nıetti adamdardyń kóptigi kóńilińdi qýanyshqa bólep, qos qoltyǵyńnan perishtedeı demep, senimge selkeý túsirmeıtindigi anyq. Keıingi jyldary eriktiler qatary eselene túsip, meıirim-shapaǵat meltektep tur.
Qalanyń batys jaq betkeıindegi ánsheıinde múlgigen tynyshtyqqa bógip turatyn jataǵan úıdiń aýlasy qarbalas qımyldan týyndaǵan dybysqa toly. Tańǵy tymyq aýada alystan estilip turǵan qýanyshtyń daýsy. Jeltoqsannyń jýan ortasyndaǵy aptalap turyp alǵan úskirik aıaz betińdi shymshyp oınaıdy. Eki jasóspirim áli qabaryp qata qoımaǵan, tobarsyǵan qardy jalpaq kúrekpen oıyp alyp, qańyltyr súıretpege tıep jatyr. Toltyryp bolǵan soń Buqpa taýynyń baýraıynan beri sozylyp jatqan tabıǵı jyranyń tabanyna tastamaq. Úı ıesi seksendi alqymdap qalǵan qarııa – Qazbek Smaǵulov. Qolǵabys jasap jatqan kórshi-qolańnyń balalaryn meıirim tunǵan, sál jasaýraǵan janarymen aımalap qoıady.
– Jas jer ortasynan aýǵan soń kúrek ustap qaırat qylýdan da qaldyq, – deıdi otaǵasy. – Onyń ústine sál sýyq tıse bel shoıyrylyp, bastyrmaı qalady. Álgi kempirime men shyǵyp tazala desem, óziń tazala deıdi. Ekeýmiz ejiktesip otyrǵanymyzda myna balalardyń kele qalǵanyn kórmeısiń be. Aınalyp keteıinder byltyr da osyndaı qolǵabys kórsetken. Nesin aıtasyń, qolymyzdy uzartyp tur.
Oblystaǵy eriktiler qys túskeli jalǵyzilikti jandardyń aýlalaryn tazalap, otyn-kómirlerin úıip berýge qolǵabys etip júr. Aldymen kelip qandaı kómek qajet ekendikterin bilip alady. Qarııalardyń ózderiniń kúsh-qýaty jetpeı jatqan san qıly sharýasy bar. Bireýlerge aýlasyn tazartý kerek bolsa, endi biriniń otyny jarylmaı jatyr. Tipti qarǵa adym jer muń bolǵan egde adamdarǵa aq qar, kók muzda ortalyqtaǵy bazarǵa baryp kelýdiń ózi kádimgideı sharýa. Mine, osyndaıda úkideı ushyp, úıirilip turǵan jastardyń kómegi kerek-aq.
– Biz osyndaı júrek jylýymen bólisetin aksııalardy dúrkin-dúrkin uıymdastyryp otyramyz, – deıdi «Volonterlerdi qoldaý ortalyǵy» front-keńsesiniń basshysy Dıdar Hamzın. – О́tken jyly 800-ge jýyq otbasyn qamqorlyqqa alsaq, bıyl meıirim sheńberin keńeıtip, bir myńnan asa otbasyn qamtýdy kózdep otyrmyz. Meıirim shýaǵy kilkip turatyn mundaı is-sharalarǵa 150-den asa erikti qatysyp júr.
Sóz sońynda oblysta toqsanǵa jýyq eriktiler uıymy bastaryn qosyp otyrǵan tórt myńnan asa izgi nıetti jastar jalǵyzilikti jandardy qamqorlyqtaryna alyp, kómek qolyn sozyp júrgendigin aıta ketelik. Jeltoqsannyń aıazyna tońǵan jandardy júrek jylýymen jylytyp júrgen jastarǵa alǵystan basqa aıtarymyz joq.
Aqmola oblysy