Astanada «Deni sau ult» atty ulttyq medısınalyq sammıt ótti. Oǵan Úkimet músheleri, Parlament depýtattary, memlekettik jáne jekemenshik medısınalyq uıymdardyń dárigerleri, oblystyq densaýlyq saqtaý basqarmalarynyń basshylary, otandyq jáne sheteldik sarapshylar, sondaı-aq kásipkerler qatysty.
Is-sharaǵa qatysýshylar aldynda sóz alǵan Premer-mınıstrdiń orynbasary Tamara Dúısenova dárigerlerdiń halyqtyń ómiri men densaýlyǵyn saqtaý, otandyq medısınanyń damýy jolyndaǵy eńbegin atap ótip, alǵysyn bildirdi. Sondaı-aq vıse-premer salany damytý jolynda Úkimet qolǵa alǵan is-sharalar týraly da aıtyp ótti.
«Bizdiń basty maqsatymyz – halyqtyń qoljetimdi ári sapaly medısınalyq qyzmet alýy úshin jaǵdaı jasaý. Qazirde elimizdiń ár aımaǵynda mamandarymyz kúrdeli otalar, onyń ishinde júrek-qan tamyrlary aýrýlaryna baılanysty operasııalar jasap júr. Bul medısınalyq qyzmet sapasyn aıtarlyqtaı jaqsartýǵa múmkindik berdi. Memleket basshysynyń tapsyrmasyna sáıkes «Aýyldyq densaýlyq saqtaýdy jańǵyrtý» ulttyq jobasy júzege asyrylyp keledi. Onyń aıasynda aýyldarda 655 alǵashqy medısınalyq-sanıtarııalyq kómek kórsetý nysanyn ashý maqsaty tur. Olardyń bir bóligi qazirde ashylyp, jumys istep tur», dedi T.Dúısenova.
Densaýlyq saqtaý mınıstrligi uıymdastyrǵan sammıt elimizdiń barlyq óńirinen kelgen 1 500-ge jýyq adamnyń basyn qosty. Bul jıyn medısına salasyndaǵy sońǵy jetistikterdi talqylaý men tájirıbe almasý alańyna aınaldy.
Sammıt aıasynda dástúrli túrde úzik otandyq mamandarǵa «Altyn shipager» ulttyq medısına syılyǵy tabystaldy. Jeńimpazdar 17 atalym boıynsha marapattaldy. Olardyń qatarynda stasıonar, jedel járdem dárigerleri, aýyldyq jerlerdegi medısına qyzmetkerleri, medısınalyq kolledj ustazdary, provızorlar, feldsherler, medbıkeler jáne t.b. mamandar bar.