27 otbasy baspanaly boldy

Merekege oraı «Aýyldyq densaýlyq saqtaýdy jańǵyrtý» ulttyq jobasy aıasynda Tarbaǵataı aýdanynda alty birdeı medısınalyq pýnkt ashyldy. Atap aıtsaq, shekara shebindegi Ahmetbulaq, Jańa talap aýyldarynda, Qabanbaı aýyldyq okrýgine qarasty Shorǵa men Qazaqstan­da jáne Sholaqorda men Aqmektep aýyldarynda zamanaýı medısınalyq pýnktter halyqqa qyzmet kórsetedi. Zamanaýı dep otyrǵanymyz, pýnktter qajetti medısınalyq qural-jabdyqtarmen tolyq qamtylǵan. Resmı derekterge kóz salsaq, ár pýnkttiń quny 150 mln teńgeni quraǵan. Sonymen qatar Quıǵan jáne Táýke aýylynyń ambýlatorııalary kúrdeli jóndeýden ótip, mereke qarsańynda esigin aıqara ashty.

Budan bólek, bir­qa­tar áleý­mettik nysandar tur­­­ǵyndar­dyń ıgiligine tabystaldy. Kúni keshe ǵana aýdan ortalyǵy Aqjarda «Street Workout» pen balalar oıyn alańy kópshilik jasty qýant­qan. Qýanyshty jańalyqtyń taǵy biri – Sheńgeldi aýylyn­da 100 oryndyq jańa mektep-balabaqsha kesheni 11 jyl­dyq bolyp qaıta quryldy. Aýdannyń damýy degen osy emes pe?

– Tarbaǵataıdyń jeke aýdan bolyp, áleýeti arta bastaǵanyn kórgen turǵyndar qýanyp otyr. Derbes aýdan bolǵaly úlken jumystar atqaryldy. Aqjar aýylynda bes kóshege asfalt tóselip, jıyrmadan astam kóshe jaryqtandyryldy. Balalar úshin eki fýtbol alańy salyndy. Igilikti isterdi aıta bersem kóp, – deıdi aýdan aqsaqaly, zeınetker Oraz Saǵatbekov.

Sondaı-aq Shyǵys baǵdar­lamasy boıynsha Tarba­ǵataı aýdanynda bir qabatty 27 bas­pana boı kóterip, Táýelsizdik kúni qarsańynda kópbalaly jáne az qamtylǵan otbasylar­ǵa úles­tirildi. Qarasý aýylyn­­da 4 otbasyna baspana kilti be­ril­se, Aqjarda 18 úıdiń kilti tabys­taldy. Mańyraqta úsh baspana, Tuǵylda eki baspana úlestirildi. Bul – mereke qarsańynda ǵana ashylǵan nysandar. Al jyl kóleminde qyrýar sharýa tyndyryldy.

Shyǵys Qazaqstan oblysy,

Tarbaǵataı aýdany