Batys Qazaqstan oblysynda «Rojkovskoe» iri gaz kondensaty ken orny ónerkásiptik paıdalanýǵa berildi. Premer-mınıstr Álıhan Smaıylov telekópir rejıminde tabıǵı gaz jáne kondensat óndirý jobasyn iske qosý rásimine qatysty, dep jazady Egemen.kz.
Gaz kondensaty ken orny 2008 jyly keń aýqymdy geologııalyq barlaý jumystarynyń nátıjesinde ashyldy.
2040 jylǵa deıin munda 14,2 mlrd tekshe metr shıki gaz jáne 7,1 mln tonna kondensat óndirý josparlanyp otyr. «Rojkovskoe» ken ornyn ıgerý arqasynda Ulttyq qor 501 mlrd, jergilikti bıýdjet 110 mlrd teńgege tolyǵady dep josparlanyp otyr.
Premer-mınıstr bul jobanyń strategııalyq mańyzy zor ekenin aıtty.
«Rojkovskoe» ken orny qosymsha tabıǵı gaz kózine aınalady. Ken ornynda óndiriletin shıkizat «Jaıyqmunaı» kompanııasynda óńdeletin bolady. Atalǵan joba sheteldik kompanııalarmen seriktestikte júzege asyrylyp otyr, ol qajetti jobalyq sheshimderdi daıyndaý men qoldaný barysynda ozyq halyqaralyq tájirıbeni qoldanýǵa múmkindik berdi», dedi Álıhan Smaıylov.