Qazaq ulttyq agrarlyq zertteý ýnıversıtetinde kúrdeli jóndeýden ótken №3 stýdenttik jataqhana men oqý ornyndaǵy ortalyq stadıon paıdalanýǵa berildi.
Is-sharaǵa Qazaqstan fýtbolynyń ardager tulǵasy Quralbek Ordabaev, Olımpıada chempıony Ermahan Ibraımov, 1-shi jartylaı orta salmaqtaǵy IBO bokstan álem chempıony Janqosh Turarov, ınvestor kompanııalar men JOO basshylyǵy, oqytýshylar, stýdentter qatysty.
Ýnıversıtettiń Basqarma tóraǵasy-rektor, UǴA vıse-prezıdenti Aqylbek Kúrishbaevtyń aıtýynsha, qazirgi ýaqytta jeke qolǵa ótip ketken ýnıversıtet aktıvterin keri qaıtarý jumystary jalǵasýda. Mysaly, №6 stýdenttik jataqhana bıyl turǵyn úı qoryna qaıtarylyp, 280 stýdent baspanaly boldy. Kezinde «Shah» meıramhanasy men ofıs retinde jeke kásipker paıdalanyp kelgen №3 stýdenttik jataqhana da keri qaıtarylyp, tolyqtaı kúrdeli jóndeýden ótti. Bul maqsatqa ýnıversıtettiń bıýdjetinen 160 mln teńgege jýyq qarajat bólinip otyr. Mundaı aýqymdy jóndeý jumystary sońǵy 20 jylda júrgizilmegen. «Rıtm Stroı EK» JShS qoldaýymen jataqhananyń syrtqy jaǵy jáne ishki bólmeler, as úıler men dálizder, tazalyq oryndary jańasha dızaınmen órnekteldi, qajetti jıhazdar, muzdatqyshtar, kir jýǵysh mashınalary men gaz plıtkalary qoıyldy. Nátıjesinde zamanaýı jabdyqtalǵan 200 bólmege stýdentter, 100 bólmege magıstranttar men jas ǵalymdar ornalasty.
Taǵy bir jaǵymdy jańalyq – «Qazaq-Stroı» JShS-men yntymaqtastyq shart negizinde 9 qabatty, 450 oryndyq jańa stýdenttik jataqhananyń qurylysy bastaldy. Oǵan tartylǵan ınvestısııa kólemi 2,3 mlrd teńgeden asady. Jataqhana qasynan stýdentter úshin Medısınalyq ortalyq turǵyzý da josparda tur. Al jańartylǵan Ortalyq stadıonǵa yntymaqtastyq negizde «Atlant Systems» JShS tarapynan 130 mln teńge tartylyp, jalpy qurylysyn «Korkem» JK júrgizgen bolatyn.
Osyndaı naqty isterdiń nátıjesinde QazUAZÝ Almaty qalasynda óz stýdentterin jataqhanamen tolyq qamtamasyz etken birden-bir ýnıversıtet atanyp otyr. Búginde ýnıversıtet quramyna 6 iri ǴZI men bir tájirıbelik sharýashylyq kiredi. QazUAZÝ álemniń jetekshi joǵary oqý oryndarynyń tájirıbesine sáıkes, ǵylym – bilim – óndiris (ıaǵnı, zerthana – aýdıtorııa – tájirıbelik sharýashylyq) júıesi engizilip, tıimdiligin kórsetip keledi.
QazUAZÝ bazasynda «Tashkent ırrıgasııa jáne aýyl sharýashylyǵyn mehanıkalandyrý ınjenerleri ınstıtýty» ulttyq zertteý ýnıversıtetiniń sý sharýashylyǵy mamandaryn daıarlaý jónindegi fılıaly ashylyp, 7 shetel joǵary oqý oryndarymen eki dıplom alý baǵdarlamasy endi. Mysaly, Varshava Jaratylystaný ǵylymdary ýnıversıtetimen (Polsha) «IT-tehnologııalardy qoldaný arqyly sý resýrstaryn basqarý» magıstratýra baǵdarlamasy boıynsha sońǵy úsh jyl qatarynan túlekter shyǵaryldy. Sondaı-aq Qytaı aýylsharýashylyǵy ýnıversıtetimen, Lıtva densaýlyq ǵylymdary ýnıversıtetimen eki dıplomdyq máseleni zańdastyrý isi qolǵa alynyp jatyr.
ALMATY