Qurlyqtyq hokkeı lıgasynda (QHL) óner kórsetip júrgen «Barys» kezekti týr oınyn óz muzaıdynynda «Sochıge» qarsy ótkizdi.
Atalǵan komandalardyń ekeýiniń de qazirgi jaǵdaıy múshkil. Qorjynynda nebári 31 upaıy bar «Barys» QHL-dyń turaqty birinshiliginiń jarys kestesinde eń sońǵy orynǵa turaqtasa, 32 upaıdy enshilegen «Sochı» jerlesterimizden nebári eki saty ǵana joǵary tur. «Qaýipti aımaqtan» shyǵý úshin qos komanda ábden jantalasty. Negizgi ýaqytta olar bir-birin ala almady. Báseke bastalǵan bette Djeremı Brakko qonaqtardy alǵa shyǵarsa, Entonı Kamara lezde esepti teńestirdi – 1:1 Úzilisten keıin Davıd Sklenıchka jergilikti jankúıelerdi qýantsa, arada eki mınýt ótkende Kırıll Rasskazov mergendik tanytty – 2:2. Úshinshi kezeńde qaqpaǵa birde-bir shaıba enbedi. Al overtaımda Arkadıı Shestakov soqqan gol astanalyqtarǵa jeńis syılady – 3:2.