Atalǵan oqıǵaǵa qatysty Soltústik Qazaqstan oblysynyń orman sharýashylyǵy jáne janýarlar dúnıesi aýmaqtyq ınspeksııasynyń bólim basshysy Oleg Bespalov pikir bildirgen. Bul týraly MTRK saıty habarlady, dep jazady Egemen.kz.
Aıyrtaý aýdany mal sharýashylyǵy keshenderiniń birinen ólgen 44 qoı tabylyp, jedel-tergeý toby shaqyrylǵan. Mamandar tekserý kezinde tis pen tyrnaq izderin anyqtaǵan. Kóbiniń kómeı tusy zaqymdanyp, bir qoı jartylaı jelingen. Polıseıler oqıǵa ornynan jarty shaqyrym tustan sileýsindikine uqsas izder tabylǵanyn jarııalaǵan.
Alaıda aýmaqtyq orman sharýashylyǵy jáne janýarlar dúnıesi ınspeksııasy atalǵan qorytyndyny teriske shyǵardy.
Oleg Bespalovtyń aıtýynsha, oblys aýmaǵynda sileýsin mekendeıdi. Sanaq kezinde anyqtalǵandaı sileýsinderdiń sany shamamen 40-tan astam. Jyrtqyshtar úshin ormandarda tamaq jetkilikti, onyń ústine sileýsin qanisher ań emes, olar bulaı shabýyl jasamaıdy. Qoılardy qyrǵan ózge janýar, ıt te bolýy múmkin.