Temirtaý qalasynda tuńǵysh ret Jastar ortalyǵy ashyldy. Jyl sońynda qurysh qala jastary úshin bul aıtarlyqtaı jańalyq boldy.
Buryn 1965 jyly salynǵan eki qabatty ǵımarat E.Bóketov atyndaǵy ýnıversıtettiń kolledji bólimshesine tıesili bolatyn. Ol bes-alty jyl qańyrap, bos turǵannan keıin qala ákimdigi byltyrdan beri qalpyna keltirýge kirisken. 666,8 mıllıon teńge qarajat jumsalyp, qurylys jumystaryn «Balqash Jibek joly» JShS atqaryp shyqqan. Aýmaǵy 2201,78 sharshy metrden turatyn nysannyń aınalasy da asfalttalyp, abattandyrylyp, syrty saıdıngpen qaptalyp, ishi qajetti qural-jabdyqtarmen jáne jıhazben qamtamasyz etilgen. Endi, temirtaýlyq jastar osynda kelip, bos ýaqytyn mazmundy ótkize alady. Olar kovorkıng, ekologııa, KVN, til úırený, jas otbasylardy qorǵaý, medıa saýattylyq, saz stýdııasy, ınklıýzıvti bilim kabınetterinde ózderiniń oı-órisi men qabiletin damytyp, sheberligin shyńdaıdy, shyǵarmashylyqpen aınalysady. Olarǵa quramynda pedagogter, psıholog, zańger, dáriger, jattyqtyrýshy bar 34 adam qyzmet kórsetedi. Munymen qosa, ortalyqta jýynatyn, kıinip-sheshinetin bólmeler men ashana da bar.
– Jastar ortalyǵy úshin dál osy jerdi tańdaǵanymyz tegin emes, – deıdi Temirtaý qalasy ákiminiń orynbasary Samat Zııashev. – Sebebi, mańaıynda Qaraǵandy ındýstrıaldyq ınstıtýty men 4 kolledj, birqatar mektep ornalasqan. Sondyqtan, stýdentter men oqýshylar úshin qolaıly bolmaq.
Qaraǵandy oblysy,
Temirtaý qalasy