Google-degi qazaq ınjeneri

Dana – aǵa ázirleýshi. Kúrdeli tehnıkalyq máselelerdi sheship, jobalardyń jalpy arhıtektýrasyn belgileıdi. Sosyn kishi ınjenerlerge arnalǵan qosalqy mindetterdi bóledi. Onyń jumysyna búkil Google izdeý ındeksi týraly aqparatty taldaý jáne «keńeıtilgen suraýǵa» senimdi ári mazmundy jaýap berý, sonyń ishinde eń paıdaly onlaın resýrstar men maqalalarǵa siltemeler berý kiredi.

– Eki jyl boldy veb-mazmundy semantıkalyq taldaýmen aınalysatyn top­tyń jetekshi ınjeneri jáne tehnıkalyq kóshbas­shy­symyn. Biz Chat GPT sııaqty generatıvti jasandy ıntellektiń jańa jetistikteri men izdeý júıesiniń múmkindikte­rin qaıta qarastyramyz. О́ıtkeni bul tehnologııa tarıhyndaǵy mańyzdy kezeń. Onyń kómegimen paıdalanýshylarǵa izdeý barysynda suraqtar­dyń múldem jańa, kúrdeli jáne keńeıtilgen túrlerin qoıýǵa, barynsha paıdaly jaýaptar alýǵa múmkindik jasaýǵa tyrysamyz. Izdeýdiń jańa dáýiri keldi, – deıdi Dana.

Ol Respýblıkalyq fızıka-matematıka mek­tebin «Altyn belgimen» bitirgen soń tehnıkalyq salada oqýyn jalǵastyratynyn birden túsingen. Aqparattyq tehnologııalar men ınformatıka baǵytynda sheteldiń úzdik oqý oryndaryna túskisi kelgen. Bir jyldan astam ýaqytyn izdenis pen bilimge jumsap, Massachýsets tehnologııalyq ınstıtýtyna oqýǵa túsedi. Oqý barysynda irgeli bilim alýǵa basa nazar aýdardy.

– Men mobıldi nemese veb-qosymshalardy qurýdy ǵana emes, kúrdeli algorıtmderdi sheshýdi úırengim keldi. Saqtalǵan aqparattaǵy trendter men zańdylyqtardy anyqtaý úshin málimetter bazasynda mashınalyq oqytýdy qoldanýdy úırendim. Ǵylymı jetekshim professor Maıkl Stoýnbreıkerdiń qamqorlyǵymen jasaǵan dıplomdyq jumysym osy salaǵa arnaldy, – dedi ol.

Oqýyn aıaqtaǵannan keıin Kremnıı alqaby­nyń tehnologııalyq alpaýyttary arasynda Dana­nyń mansaby bastaldy. Aıta ketetini, amerıka­lyq joǵary oqý oryndary túlekterine ju­mys izdeýge júıeli túrde kómektesedi. Bul úderis áldeqashan bir izge túsken. Mysaly, Mas­sachýsets tehnologııalyq ınstıtýty jyl saıyn álem­degi eń jaqsy kompanııalardyń jumys berýshileri keletin aýqymdy jumys jármeńkesin ótkizedi. Sońǵy kýrs stýdentteri túıindeme beredi, eger olar kompanııaǵa unaǵan bolsa, aldy­men telefon ar­qyly suhbattasyp, keıin kompa­nııanyń keńsesine keńeıtilgen suhbatqa shaqyrylady.

– Eki aı boıy ártúrli kompanııa suhbatqa shaqyrdy. Solaı Amazon, Microsoft, Google, Apple, Square sııaqty birneshe kompanııadan jumysqa shaqyrtý aldym. Tańdaýym Google bol­dy. Sebebi korporatıvti mádenıeti, damyǵan tálim­gerlik júıesi jáne úlken kólemdegi teh­nı­kalyq mindetteri unady. Bul – ınformatıka salasyndaǵy aldyńǵy qatardaǵy kompanııa. Izdenis pen tabandylyqty tý qylyp ustaý kerek. Sonda qazaq jastary álemdi baǵyn­dyra alady, – deıdi Dana.