О́tken táýlikte Qazaqstan TJM kúshteri 82 órt oqıǵasyna, 95 izdestirý jumysyna, avarııalyq-qutqarý jáne basqa da jumystarǵa, barlyǵy 177 shyǵý jasap, 357 adamdy, onyń ishinde 39 balany qutqaryp, evakýasııalaǵan, dep habarlaıdy Egemen.kz Tótenshe jaǵdaılar mınıstrliginiń baspasóz qyzmetine silteme jasap.
Qaraǵandy oblysy avtojoldarynda TJD qutqarýshylary qar qursaýynda qalǵan avtokólikterden 20 adamdy, onyń ishinde 4 balany qutqardy. Sonymen qatar, TJM 52859 áskerı bóliminiń áskerı qyzmetshilerimen jáne polısııamen birlesip blokposttardyń jabyq pýnktterinen jaqyn mańdaǵy eldi mekender men jol boıyndaǵy kempıngterge 287 adamdy, onyń ishinde 29 balany evakýasııalady.
Oblystyq mańyzy bar «Kýrchatov – Semeı» avtojolynda kólik qozǵalysy jabylýyna baılanysty Abaı oblystyq TJD kúshterimen 5 adam, onyń ishinde 1 bala ýaqytsha ornalastyrý pýnktine birge júrip barǵan. Sondaı-aq Semeı qalasynda TJD qutqarýshylary Shúlbi sý qoımasynda avtokólikpen muz astyna túsip ketken 2 balyqshyny qutqardy.
Jetisý oblysy Alakól aýdanynda «Úsharal-Dostyq» avtojolynyń 130 km Jalańashkól ýchaskesinde TJD kúshimen qar qursaýynda qalǵan eki jeńil kólikten 3 adam qutqarylyp, Dostyq stansııasyna jetkizildi.
Aqmola oblysy Arshaly aýdany Túrgen aýylynan atpen mal izdep shyǵyp, joǵalyp ketken eki er adamdy izdeý toby aýyldan 15 km qashyqtyqtan tapty.
Ulytaý oblysy Jańaarqa aýdanynda TJD, jergilikti atqarýshy organdardyń, polısııa bóliminiń, jergilikti turǵyndardyń kúshimen 2 qańtarda «Bekshe» qystaǵynan Yntymaq aýylyna qaraı shyǵyp, joǵalyp ketken er adamdy izdeý toby 3 qańtarda «Bekshe» qystaýynan 10 km qashyqtyqtan taýyp aldy.
Sonymen qatar Qaraǵandy, Aqmola oblystarynda «Almaty-Ekaterınbýrg», «Shýchınsk-Astana» avtojoldarynda avtokólikter soqtyǵysqan kezde 26 adam, onyń ishinde 1 bala qutqaryldy.