Premer-mınıstrdiń orynbasary Tamara Dúısenovanyń tóraǵalyǵymen ótken keńeste elektrondyq kitaphana júıesiniń damýy talqylandy. Jıynǵa Mádenıet jáne aqparat, Sıfrlyq damý, ınnovasııalar jáne aeroǵarysh ónerkásibi mınıstrlikteri, Ulttyq akademııalyq kitaphananyń ókilderi qatysty.
Búginde elimizde 11 myńnan asa kitaphana túrli aqparattyq júıe men katalogti qoldanyp keledi. Elimizdegi kitap qoryn júıeleý úshin biryńǵaı avtomattandyrylǵan platforma jasaqtaý jumysy bastaldy. Mamandardyń sózinshe, onyń arqasynda oqyrmandar qajetti kitapty nemese onyń elektrondy nusqasyn ońaı taba alady. Júıeni engizý aıasynda barlyq kitaphanaǵa kirý múmkindigi qarastyrylǵan biryńǵaı elektrondy oqyrman bıleti ázirlenedi. Qoldanýshylar elektrondy Úkimet portaly arqyly tirkelip, bıletke qol jetkizbek.
Platformada kitap qoryn onlaın tolyqtyrý fýnksııasy qarastyrylǵan. Ony jeke baspalar da paıdalana alady: jaryq kórgen jańa týyndylar júıege engizilip, aqyly jazylýshylarǵa qoljetimdi bolmaq. Osylaısha, jeke baspalar men avtorlardyń múddelerin qorǵaý josparlanǵan.
– Biz eldegi baspalar ókilderimen kezdesip, kitaptardy jarııalaý tártibin túsindirdik. Olar usynylǵan sharttarǵa kelisim berdi, – dedi mádenıet jáne aqparat vıse-mınıstri Arman Júdebaev.
Platformany qanatqaqty rejimde 2024 jyly iske qosý josparlanǵan. Bastapqyda ol iri kitaphanalar bazasynda jumys isteı bastaıdy.
«Sıfrlyq platforma elimizdegi barlyq kitap qory azamattarǵa qoljetimdi bolýy úshin ázirlenip otyr. Eń aldymen, elektrondy nusqaǵa 10 iri kitaphana ótedi. Al qalǵandary sáıkestendirý jumystaryn qolǵa alýy kerek. Kitap qory tolyqtaı sáıkes kelgen jaǵdaıda kitaphanalar oqyrmanǵa arnalǵan izdeý baǵdarlamasyn beıimdeýge tıis», dep atap ótti T.Dúısenova.