Almatydan Aqtóbege baǵyt alǵan poıyzda jolserik qyzdyń kómegimen júkti áıel qyz balany dúnıege ákeldi, dep habarlaıdy Egemen.kz.
Jas ana Aınagúl Tileýbergenova Almaty-Aqtóbe baǵytyndaǵy №33 poıyzben Toǵys stansasynan Aqtóbe qalasyna bara jatqan. 7 qańtarda jolaýshyny tolǵaǵy qysty.
«Poıyz brıgadasynyń jumysshylary nusqaý boıynsha mashınıstke habarlap, jaqyn mańdaǵy Jem stansııasyna jedel járdem brıgadasyn shaqyrdy. Jedel járdem kelgenge deıin poıyz jolserigi Ǵalııa Qabdrahmanova vagonda áıelge bosanýǵa kómek kórsetti, al saǵat 14:27-de jas ana aman-esen qyz balany dúnıege ákeldi», delingen Jolaýshylar tasymaly kompanııasynyń baspasóz qyzmeti taratqan habarlamada.
Jem stansasyna jetkende jańa týǵan náreste men onyń anasyn jedel járdem qyzmetkerleri qabyldady.
«Poıyzdyń barlyq qyzmetkerlerine osyndaı tótenshe jaǵdaıda qol ushyn berip, meni jalǵyz qaldyrmaǵandary úshin úlken alǵysymdy bildiremin. Endi qyzyma óskende aıtarym bar», deıdi balanyń anasy Aınagúl Tileýbergenova.
Keıinirek jańadan týǵan shaqalaqqa Malıka degen esim qoıylǵany belgili boldy.
Aıta keteıik, sońǵy 3 jylda kompanııa poıyzdarynda 11 sábı dúnıege kelgen.